14:31, 04 - مامىر 2021 | GMT +6
قازاقستان پرەزيدەنتى تاجىكستانعا رەسمي ساپارمەن بارادى
نۇر- سۇلتان. قازاقپارات - 19-20 -مامىر كۇندەرى قاسىم- جومارت توقايەۆ پرەزيدەنت ەمومالي راحموننىڭ شاقىرۋىمەن تاجىكستان رەسپۋبليكاسىنا رەسمي ساپارمەن بارادى،
دەپ حابارلايدى مەملەكەت باسشىسىنىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا.
ساپار اياسىندا قاسىم- جومارت توقايەۆ پەن ەمومالي راحمون شاعىن جانە كەڭەيتىلگەن قۇرامدا ەكىجاقتى كەلىسسوزدەر وتكىزبەك. وندا ساياسي ديالوگتى، ساۋدا- ەكونوميكالىق، ينۆەستيتسيالىق جانە مادەني- گۋمانيتارلىق بايلانىستاردى ودان ءارى نىعايتا وتىرىپ، قازاق- تاجىك ستراتەگيالىق سەرىكتەستىگىن دامىتۋعا باسىمدىق بەرىلمەك. كەلىسسوزدەر بارىسىندا وڭىرلىك كووپەراتسيانى جانداندىرۋ، ورتالىق ازياداعى تۇراقتىلىق پەن قاۋىپسىزدىكتى قامتاماسىز ەتۋ ماسەلەلەرىنە ەرەكشە ءمان بەرىلەدى.