گرەكيا تۋريستەر ءۇشىن اشىلادى
گرەكيا پرەمەر- ءمينيسترى كيرياكوس ميتسوتاكيس ەلدەگى سانكتسيالاردى الىپ تاستاۋ جوسپارىن جاريالادى.
بۇل ەلدە تۇتىنۋشىلارعا قىزمەت كورسەتەتىن مەيرامحانالار مەن كافەلەر 3-مامىردان باستاپ، مەكتەپتەر 10-مامىردان باستاپ اشىلادى.
سونىمەن بىرگە، ەلدەگى قازىرگى كومەندانتتىق ساعات ساقتالادى. ەندى عانا رەجيم 21:00-دە ەمەس، 23:00-دە باستالادى.
وتكەن جىلدىڭ قاراشا ايىندا گرەكيادا لوكداۋن ەنگىزىلگەن بولاتىن.
Worldometer ۆەب- سايتىنىڭ حابارلاۋىنشا، گرەكيادا پاندەميا باستالعاننان بەرى شامامەن 343 مىڭ ادام كوروناۆيرۋستى جۇقتىرعان جانە 10,3 مىڭعا جۋىق ناۋقاس قايتىس بولعان.
ايتا كەتەيىك، كوروناۆيرۋس پاندەمياسىنان قاتتى زارداپ شەككەن الەم ەلدەرى ءتۋريزمدى دامىتۋدى قايتا جولعا قويىپ جاتىر. وسىعان دەيىن مالتا ۇكىمەتى ەلگە كەلگەن تۋريستەرگە 200 ەۋرو بەرۋگە دايىن ەكەنىن حابارلاعان بولاتىن.
مالتا تۋريزم ءمينيسترى كلەيتون بارتولونىڭ ايتۋىنشا، ەل ۇكىمەتى تۋريست بەس جۇلدىزدى قوناقۇيدەن ورىن العان بولسا، سول تۋريستكە 100 ەۋرو، قوناقۇيگە تاعى 100 ەۋرو بەرەدى. ءتورت جۇلدىزدى قوناق ۇيدە تۇرعاندار جالپى 150 ەۋرو، ال ءۇش جۇلدىزدى قوناقۇيدەن ورىن العاندار 100 ەۋرو الادى.
ۇكىمەت ساياحاتشىلاردى وسىلاي ىنتالاندىرۋ ارقىلى بيىل 35 مىڭ تۋريست تارتقىسى كەلەدى. مالتاعا 2019 -جىلى 2,7 ميلليون تۋريست كەلگەن بولسا، كوروناۆيرۋس پاندەمياسى باستالعاننان بەرى كورسەتكىشتەر 80 پايىزعا تومەندەگەن.
massaget.kz