08:31, 04 - مامىر 2021 | GMT +6
نۇر- سۇلتاندا جاقسىلىق ۇشكەمپىروۆتى ەسكە الۋعا ارنالعان حالىقارالىق تۋرنير وتەدى
نۇر- سۇلتان. قازاقپارات - 7-9-مامىر كۇندەرى نۇر- سۇلتان قالاسىندا گرەك- ريم كۇرەسىنەن وليمپيادا جانە الەم چەمپيونى، قازاقستاننىڭ ەڭبەك ەرى جاقسىلىق ۇشكەمپىروۆتى ەسكە الۋعا ارنالعان حالىقارالىق تۋرنير وتەدى، دەپ حابارلايدى قازاقپارات.
ق ر ۇلتتىق وليمپيادا كوميتەتىنەن ءمالىم ەتكەندەي، اتالعان دودا استانادا ورنالاسقان جاقسىلىق ۇشكەمپىروۆ اتىنداعى جەكپە- جەك سارايىندا وتەتىنى جوسپارلانعان.
حالىقارالىق باسەكەگە گرۋزيادان – 26، تاجىكستاننان – 11، قىرعىزستاننان – 21، رەسەيدەن - 7، وزبەكستاننان 15 بالۋان قاتىسادى.
ەسكە سالايىق، گرەك- ريم كۇرەسىنەن تۇڭعىش وليمپيادا چەمپيونى، الەم چەمپيونى، قازاقستاننىڭ ەڭبەك ەرى، «بارىس»، «قۇرمەت» «پاراسات» وردەندەرىنىڭ يەگەرى جاقسىلىق ءامىرالى ۇلى ۇشكەمپىروۆ 2020 -جىلدىڭ 2 -تامىزىندا 69 جاسىندا دۇنيەدەن وزدى.
كەيىننەن، مەملەكەت باسشىسى قاسىم- جومارت توقايەۆتىڭ باستاماسىمەن ەلورداداعى جەكپە- جەك سارايىنا جاقسىلىق ۇشكەمپىروۆ ەسىمى بەرىلدى. سونداي- اق ونىڭ ەسىمىمەن جامبىل وبلىسىنداعى «تاراز- ارەنا» ستاديونى اتالا باستادى.