قاسىم-جومارت توقايەۆ قىرعىزستان جانە تاجىكستان پرەزيدەنتتەرىمەن تەلەفون ارقىلى سويلەستى
مەملەكەت باسشىلارى قىرعىز- تاجىك شەكاراسىندا بولعان قارۋلى قاقتىعىستان كەيىنگى قالىپتاسقان جاعدايدى تالقىلادى. قاسىم-جومارت توقايەۆ سادىر جاپاروۆقا جانە قىرعىز حالقىنا باۋىرلاس ەل ازاماتتارىنىڭ قازا بولۋىنا بايلانىستى كوڭىل ايتتى.
قازاقستان پرەزيدەنتى مۇنداي شەكارالىق ماسەلەلەردى ءوزارا تۇسىنىستىك پەن تاتۋ كورشىلىك اياسىندا تەك قانا بەيبىت جولمەن شەشۋ قاجەت ەكەنىن اتاپ ءوتتى. ول دۋشانبەدە وتەتىن جوعارى دەڭگەيدەگى كەلىسسوزدەرگە تابىس تىلەدى. سونىمەن قاتار مەملەكەت باسشىسى سادىر جاپاروۆپەن تىلدەسۋ بارىسىندا قاجەت بولعان جاعدايدا قازاقستاننىڭ قىرعىزستانعا گۋمانيتارلىق كومەك كورسەتۋگە ءازىر ەكەنىن ايتتى.
سادىر جاپاروۆ باۋىرلاس قازاقستاننىڭ دوستىق نيەت تانىتقانىنا ريزاشىلىق ءبىلدىرىپ، پرەزيدەنت قاسىم- جومارت توقايەۆپەن ءوزارا ىنتىماقتاستىقتىڭ بارلىق ماسەلەلەرىن جەدەل شەشۋ ءۇشىن تۇراقتى بايلانىستا بولاتىنىن جەتكىزدى. سونداي-اق، قازاقستان پرەزيدەنتى قاسىم-جومارت توقايەۆ تاجىكستان پرەزيدەنتى ەمومالي راحمونمەن تەلەفون ارقىلى سويلەستى. قازاقستان پرەزيدەنتى قىرعىزستان شەكاراسىندا قالىپتاسقان شيەلەنىستى احۋالعا بايلانىستى الاڭداۋشىلىق ءبىلدىرىپ، بۇل جاعداي كورشى مەملەكەتتەر مەن ولاردىڭ ازاماتتارىنا قاۋىپ توندىرەتىنىن ايتتى.
قاسىم-جومارت توقايەۆ شەكارا سىزىعىن بەلگىلەۋ سياقتى كۇردەلى ماسەلەلەر ءوزارا سەنىم مەن دوستىققا نەگىزدەلە وتىرىپ، كونسترۋكتيۆتى كەلىسسوزدەر بارىسىندا شەشىلۋى كەرەك ەكەنىن اتاپ ءوتتى.
مەملەكەت باسشىسىنىڭ ايتۋىنشا، مۇنداي جاعدايدا ءوزارا ۇستامدىلىق تانىتىپ، كۇش قولدانۋعا جول بەرمەۋ اسا ماڭىزدى. قاسىم- جومارت توقايەۆ الداعى ۋاقىتتا وسىنداي قاقتىعىستاردى بولدىرماۋ جونىندە ءتيىمدى كەلىسىمگە قول جەتكىزۋ ءۇشىن دۋشانبەدە جوعارى دەڭگەيدە كەزدەسۋ وتكىزۋ تۋرالى ۋاعدالاستىقتى قولدادى. ەمومالي راحمون قاسىم-جومارت توقايەۆقا شەكاراداعى قاقتىعىستىڭ تاريحى مەن قازىرگى قالىپتاسقان جاعداي تۋرالى تولىق اقپارات بەردى. مەملەكەتتەر باسشىلارى ورتالىق ازيا وڭىرىندەگى احۋالعا قاتىستى پىكىر الماسۋ ماقساتىمەن تۇراقتى بايلانىستا بولۋعا ۋاعدالاستى. ەكى ەلدىڭ قۇزىرلى ۆەدومستۆولارى جوعارى دەڭگەيدەگى كەزدەسۋگە دايىندىق جۇمىستارىن جۇرگىزەدى.