الماتىدا ەلەكتر جارىعى نەگە ءجيى وشەدى

الماتى. قازاقپارات - الماتىلىقتار ەلەكتر قۋاتىنىڭ ءجيى وشىرىلەتىنىنە شاعىمدانا باستادى. اكىمدىك ونىڭ سەبەبىن ءتۇسىندىردى، دەپ حابارلايدى قازاقپارات ءتىلشىسى.

الماتى قالاسى ەنەرگوتيىمدىلىك جانە ينفراقۇرىلىمدىق دامۋ باسقارماسىنىڭ باسشىسى ايدار بەركىمبايەۆتىڭ ايتۋىنشا، قالاداعى ەلەكتر جەلىلەرى توزعان. سوندىقتان اپاتتار ءجيى بولادى.

«الاتاۋ جارىق كومپانياسى» ا ق جوندەۋ قىزمەتى شۇعىل جۇمىس ىستەيدى. ءار اۋداندا جەدەل قىزمەت كورسەتۋ جاساعى بار.

«قالاداعى اپاتتاردىڭ بارلىعى ءبىزدىڭ باقىلاۋىمىزدا. ءبىر ساعاتتىڭ ىشىندە اپاتتى انىقتاپ، تەز ارادا ەلەكتر قۋاتىن ىسكە قوسۋعا تىرىسامىز. ەلەكتر ەنەرگياسى تۇراقتى، جىل بويى، تاۋلىك بويى جۇمىس ىستەيدى. اپاتتىڭ تۇرلەرى كوپ. ەڭ باستىسى، ءبىزدىڭ قالامىزداعى بارلىق اپاتتار ءبىر ساعاتتا قالپىنا كەلتىرىلەدى»، - دەدى ايدار بەركىمبايەۆ.