الماتى ماڭىنداعى اۋىلدا ەر ادامعا وق اتىلدى: پوليتسيا كۇدىكتىنى ىزدەستىرىپ جاتىر

الماتى. قازاقپارات - الماتى وبلىسى، قاراساي اۋدانى، شالقار اۋىلىندا بەلگىسىز بىرەۋ ەر ادامنىڭ اياعىنا وق اتتى.

ونىڭ جاعدايى وتە اۋىر. پوليتسيا كۇدىكتىنى ىزدەۋدە، دەپ حابارلايدى قازاقپارات ءتىلشىسى.

وقيعا ورنىنان تۇسىرىلگەن ۆيدەو الەۋمەتتىك جەلىدە تارادى. بەينەجازبادا كۋاگەرلەر قارۋلى شابۋىلدىڭ ورنىن كورسەتەدى. سونداي-اق وندا وقيعا سالدارىنان ەگدە جاستاعى ادامنىڭ جارالانعانى ايتىلادى.

الماتى وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ مالىمەتىنشە، وقيعا 24- ساۋىرگە قاراعان ءتۇنى بولعان. شالقار اۋىلىنىڭ 62 جاستاعى تۇرعىنى زارداپ شەككەن.

«تەكسەرۋ بارىسىندا قاسكەلەڭنىڭ 29 جاستاعى تۇرعىنى انىقتالدى. ونى ۇستاۋ بويىنشا جەدەل ىزدەستىرۋ ءىس-شارالارى ءجۇرىپ جاتىر. بۇل فاكت «ادام ءولتىرۋگە وقتالۋ» ارەكەتى رەتىندە تىركەلدى. ءىستىڭ سەبەپتەرى مەن ءمان-جايى انىقتالادى. وزگە اقپارات جاريا ەتىلمەيدى»، - دەدى الماتى وبلىستىق پوليتسيا دەپارتامەنتىنىڭ باسپا ءسوز قىزمەتى.

دارىگەرلەر زارداپ شەككەن ادامنىڭ سول اياعىن وق تەسىپ وتكەنىن ايتتى.

ول شامامەن ساعات 23.00 دە قاراساي اۋداندىق ورتالىق اۋرۋحاناسىنا جەتكىزىلگەن. ەر ادامنىڭ جاعدايى وتە اۋىر.

«ناۋقاس رەانيماتسيا بولىمىنە ءتۇستى. ول سول جاق اياعىنان جارالانعان. سول جاق جىلىنشىگىنە وق تيگەن. اياعىنىڭ ەكى سۇيەگىنىڭ جوعارعى بولىگى سىنعان. جالپى جاعدايى وتە اۋىر. جاساندى تىنىس الدىرۋ اپپاراتىندا جاتىر»، - دەپ حابارلادى وبلىستىق قوعامدىق دەنساۋلىق ساقتاۋ باسقارماسىنان.

ەسكە سالا كەتەيىك، 24- ءساۋىر كۇنى الماتىدا تۇرعىن ءۇي كەشەنىنىڭ كۇزەتشىسى اڭشى مىلتىعىنان جاراقات الدى. پوليتسيا دەپارتامەنتىنىڭ مالىمەتىنشە، كۇزەتشى مەن بەلگىسىز ەر ادامنىڭ اراسىندا تۋىنداعان جانجال سالدارىنان كۇزەتشىنى اڭشى مىلتىعىمەن اياعىنان اتقان.