التايدا جاڭا تاريحي- ولكەتانۋ مۇراجايى اشىلادى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

التايدا جاڭا تاريحي- ولكەتانۋ مۇراجايى اشىلادى - «اعاجاي- التاي اقپارات» سايتى

قىتايدىڭ التاي ايماعىنداعى تاريحي- ولكەتانۋ مۇراجايى جاڭا زاماناۋي عيماراتقا كوشتى. جاڭا مۋزەيدىڭ اشىلۋىنا وراي 18-مامىردا «اشىق ەسىك كۇنى» شاراسى وتەدى، دەپ حابارلايدى kazakh.altxw.com سايتى.

«اۋماعى 6416 شارشى مەتر ەڭسەلى نىساننىڭ ءبىرىنشى جانە ەكىنشى قاباتىندا «التىنتاۋ تاريحى» اتالاتىن كورمە زالى، ءۇشىنشى قاباتىندا «التايداعى جارتاس سۋرەتتەرى» كورمە زالى ورنالاسقان. جالپى بۇل زالدارعا التاي ايماعىنىڭ تاريحى مەن مادەنيەتىن تانىتاتىن ءتۇرلى قۇندى جادىگەرلەر قويىلعان. مۋزەيدە تاس قۇرالدار، قىش ىدىستار، قولا، التىن جانە كۇمىس بۇيىمدار، تەمىر قۇرالدار جانە باسقا دا مادەني جادىگەرلەر ساقتالعان. ولاردىڭ اراسىندا جەمەنەي اۋدانىنىڭ «تۇڭتياندۇڭ» جۇرتىنان تابىلعان، وسىدان شامامەن 45 مىڭ جىل بۇرىنعى تاس قۇرالدار، 4 مىڭ جىل بۇرىنعى قولا داۋىرىندەگى مادەني مۇرالار مەن بەدەرلى قىش بۇيىمدارى، مىس اينا جانە قولا بۇيىمدار بار»، - دەپ جازادى «اعاجاي- التاي اقپارات» سايتى.

قۇلىن التىنبەك قىزى الەم چەمپيوناتىنىڭ قولا جۇلدەگەرى اتاندى- KAZNEWS

پولشانىڭ كەلتس قالاسىندا بوكستان ءوتىپ جاتقان جاستار اراسىنداعى الەم چەمپيوناتىندا 51 كەلى سالماق دارەجەسىندە موڭعوليالىق قازاق بوكسشى قىز قۇلىن التىنبەك قىزى قولا جۇلدەگەر اتاندى، دەپ حابارلايدى موڭعوليانىڭ Kaznews اقپاراتتىق پورتالى.

«قۇلىن التىنبەك قىزى جارتىلاي فينالداعى كەزدەسۋىن رەسەيلىك ۆالەرينا لينوۆامەن وتكىزىپ، 5:0 ەسەبىمەن ۇتىلىپ قالدى. ايتا كەتەيىك، بۇعان دەيىن ۋكراينالىق داريا- ولگا گۋتارينانى جانە قازاقستاندىق گۇلنار تۇراپبايدى جەڭىپ، جارتىلاي فينالعا وتكەن بولاتىن. ول وسىلايشا جاستار اراسىنداعى الەم چەمپيوناتىندا 51 كەلى سالماق دارەجەسىندە قولا جۇلدەگەر اتاندى»، - دەپ جازدى Kaznews.

يۋنەسكو ءابۋ رايحان ءال- ءبيرۋنيدىڭ 1050 -جىلدىعىن اتاپ ءوتۋ تۋرالى شەشىم قابىلدادى - «ءو ز ا» اقپاراتتىق اگەنتتىگى

يۋنەسكو اتقارۋشى كەڭەسىنىڭ 211 سەسسياسىندا ۇلى عالىم ءابۋ رايحان بەرۋنيدىڭ (973-1048) تۋعانىنا 1050 جىل تولۋىنا وراي، وسى مەرەكەلىك داتانى 2022-2023 -جىلدارى يۋنەسكو- نىڭ قامقورلىعىمەن كەڭىنەن اتاپ ءوتۋ تۋرالى شەشىم قابىلداندى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى. «بۇل مەرەيتويدى يۋنەسكو- نىڭ قامقورلىعىمەن اتاپ ءوتۋ باستاماسىن وزبەكستان رەسپۋبليكاسى ازىرلەدى جانە باس شتابقا ۇسىنىلعان قۇجاتتى يران يسلام رەسپۋبليكاسى تاجىكستان جانە تۇركيا سياقتى ەلدەر تاراپىنان قولداۋ تاپتى. شەشىم وسى جىلدىڭ قاراشا ايىندا پاريجدە وتەتىن يۋنەسكو باس كونفەرەنتسياسىنىڭ 41-سەسسياسىندا بەكىتىلەدى دەپ كۇتىلۋدە»، - دەپ جازادى «ءو ز ا» اقپارات اگەنتتىگى.

اتالعان ب ا ق- تىڭ دەرەگىنشە، ءابۋ رايحان مۋحاممەد يبن احمەد ءال- بيرۋني - ورتاعاسىرلىق ەنتسيكلوپەدياشى عالىم، استرونوم، ماتەماتيك، فيلوسوف، گەوگراف، ەتنوگراف، انتروپولوگ، گەولوگ، تاريحشى، بوتانيك، فارماكولوگ جانە گۋمانيست بولعان.

«بيرۋني 973 -جىلدىڭ 4 قىركۇيەگىندە قيات قالاسىنىڭ ىرگەسىندەگى اۋىلدا دۇنيەگە كەلدى. ول 150 گە جۋىق ەڭبەك جازىپ، ءوز داۋىرىنەن جاراتىلىستانۋ جانە الەۋمەتتىك عىلىمداردىڭ دەرلىك بارلىق سالالارىن قامتيتىن ۇلكەن عىلىمي مۇرا قالدىردى. ءبيرۋنيدىڭ ەڭبەكتەرى كوپتەگەن تىلدەرگە اۋدارىلىپ، بۇگىنگى كۇنگە دەيىن وزەكتىلىگىن ساقتاپ كەلەدى. ءابۋ رايحان مۋحاممەد يبن احمەد ءال- بيرۋني 1050 -جىلدىق مەرەيتويىنا بايلانىستى وزبەكستاندا ءبىرقاتار ءىس- شارا وتەدى. سونىمەن قاتار، ءبيرۋنيدىڭ مەرەيتويى يران، تاجىكستان مەن تۇركيادا كەڭىنەن اتالىپ وتەدى جانە بىرلەسكەن ءىس- شارالار وتكىزىلۋى جوسپارلانعان»، - دەپ جازادى «ءو ز ا» اقپارات اگەنتتىگى.

قازاقستاننىڭ وتاندىق ۆاكسيناسى حالىققا ەگىلەدى - TRT

قازاقستاندا كوروناۆيرۋسقا قارسى جەتىلدىرىلگەن وتاندىق QazVac ۆاكتسيناسى 26 -ساۋىردەن باستاپ حالىققا ەگىلە باستايدى، دەپ حابارلايدى تۇركيا راديو تەليەۆيزيا پورتالى.

«ەلدىڭ وڭتۇستىگىندەگى جامبىل وبلىسىنداعى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىندا وتاندىق ۆاكتسينانىڭ العاشقى 50 مىڭ دوزاسى ءوندىرىلدى. قازاق عالىمدارى جەتىلدىرگەن، كلينيكالىق زەرتتەۋلەردە قاۋىپسىزدىگى دالەلدەنگەن وتاندىق ۆاكتسينا ەندى ازاماتتارعا سالىنادى. وتاندىق ۆاكتسينانىڭ العاشقى دوزاسىنىڭ ايماقتارعا جونەلتىلۋىن باقىلاعان ۆيتسە- پرەمەر ەرالى توعجانوۆ «قازاقستان كوۆيد-19-عا قارسى ءوزى ۆاكسيناسىن جەتىلدىرگەن العاشقى بەس ەل قاتارىنا ەندى» دەدى.

توعجانوۆ وتاندىق ۆاكسينانىڭ دۇنيەجۇزىلىك دەنساۋلىق ساقتاۋ ۇيىمىنىڭ تىزىمىنە ەنگەنىن ايتتى. قازاقستان ۆاكسيناسىنىڭ ەندى حالىقارالىق ستاندارت سەرتيفيكاتىن الۋى قاجەت. توعجانوۆ وسى ماقساتتى تۇرىكتىڭ «اتاباي» كومپانياسىمەن ىنتىماقتاستىق جاسايتىندارىن ايتتى»، - دەپ جازادى TRT.