بريتاندىقتار ەرەكشە كارانتيندىك وفيس ءتۇرىن ويلاپ تاپتى

نۇرسۇلتان. قازاقپارات – لوندوندا ونەرتاپقىشتار ەرەكشە كارانتيندىك كەڭسە ويلاپ تاپتى. ونى جاساپ شىعارۋشىلار موبيلدى كەڭسە پاندەميانىڭ كەسىرىنەن قاشىقتان جۇمىس ىستەۋگە كوشكەندەر ءۇشىن تاپتىرماس دۇنيە ەكەنىن ايتادى.

ماسەلەن، مودۋلدى كاپسۋلانىڭ ىشىندە جۇمىس ىستەۋ وتە ىڭعايلى اتموسفەرا بولعاندىقتان ءۇي شارۋاسىنا ەلەڭدەمەي جۇمىس ىستەۋگە بولادى. جوبا اۆتورىنىڭ ايتۋىنشا، مۇنداي وي 2020 -جىلى جاريالانعان ءبىرىنشى لوكداۋن كەزىندە پايدا بولدى. جۋىردا عانا قۇرىلعان فيرما قازىردىڭ وزىندە شەت ەلدەردەن دە تاپسىرىس الا باستادى.

توماسو بوانو، جوبا ۇيىمداستىرۋشىسى:

- كەڭسەنى ساتىپ العان العاشقى ادامنىڭ ەكى بالاسى بار. ءۇي جاعدايىندا جۇمىس ىستەتىن مۇمكىندىگى جوق.

ەلين، تۇتىنۋشى: - جاقىن ارادا وفلاين جۇمىستىڭ باستالۋى ەكىتالاي. مەن ءبىر بولمەنىڭ ىشىندە تاماقتانىپ، سپورتپەن شۇعىلدانىپ، دەمالامىن. ناتيجەلى جۇمىس ىستەۋىم ءۇشىن بار نازارىمدى سۇيىكتى ىسىمە اۋدارۋ ءۇشىن كەڭىستىكتى وزگەرتۋىم كەرەك.

بيىكتىگى 2,5 مەتر كاپسۋلانى العانداردىڭ بارلىعى جوبا اۆتورىنا ريزاشىلىعىن ءبىلدىرىپ جاتىر. كوبى كەڭسەسىن باقشاسىندا ورنالاستىرعان. ديزاينەرلەر بولسا ونىڭ قاپتاۋىشىن وزگەرتە باستادى.

يوناس پريسمونتاس، جوبا ساۋلەتشىسى:

- كەڭسەنى تۇرلەندىرىپ جاساپ بەرە الامىز. تاپسىرىس بەرۋشىنىڭ قالاۋى بويىنشا ءتۇسى دە ءار ءتۇرلى بولۋى مۇمكىن. تۇتىنۋشىنىڭ تالعامى ەسكەرىلىپ وتىرادى.

24.kz