ادامدى روبوت الماستىرعان زامان تۋدى ما؟

نۇرسۇلتان. قازاقپارات – الەمدە ىندەتتىڭ تارالۋىنا بايلانىستى قۇلتەمىرلەردىڭ قىزمەتىنە جۇگىنۋ كوبەيىپ كەلەدى.

ىندەت جاعدايىندا كوپتەگەن سالا ادامدارى اراسىندا ۆيرۋستىڭ تارالۋىنىڭ الدىن الۋ ءۇشىن وسىنداي قاۋىپسىز ءادىس- امالدى قولدانۋعا دەن قويعان. اسىرەسە قوناق ءۇي، مەيرامحانا، اۋە تاسىمالداۋ سالالارى. كوروناۆيرۋس ىندەتى الەمدەگى كوپتەگەن كومپانيانى روبوت جاساۋ تەحنولوگياسىن دامىتۋعا يتەرمەلەۋدە.

مىسالى، شۆەيتساريادا ۇشاق ءىشىن ونشاقتى مينۋتتا زارارسىزداندىراتىن روبوت جاساپ شىعارىلدى. تازارتۋ ۋلتراقىزىل ساۋلەمەن جۇرگىزىلەدى. قازىر وسى ءادىستى جەرگىلىكتى اۋە كومپانيالاردىڭ ءبىرى ايماقتىق رەيستەرىنە قولدانىپ، سىناقتان وتكىزىپ جاتىر. ماماندار بۇل اۋە تاسىمالىن جانداندىرۋعا كومەكتەسەدى دەپ وتىر.

سمەحدي گەنەن، Helvetic airways اۋە كومپانياسىنىڭ وكىلى:

- بىزگە جولاۋشىلاردىڭ اۋە ساپارلارىنا سەنىمىن قايتا قالپىنا كەلتىرۋ ماڭىزدى. ادامدار ۇشاقتار تولىق زارارسىزداندىرىلىپ، ءتۇرلى ۆيرۋستان تازا بولاتىنىنا كوز جەتكىزسە ەش الاڭسىز قايتا ۇشا باستار ەدى.

وسى ەلدەگى تاعى ءبىر كومپانيا ءتۇرلى كوكتەيل جاساپ، قىزمەت كورسەتە الاتىن روبوت بارمەن ويلاپ تاپتى. «بارني» دەپ اتالاتىن قۇلتەمىر ءتۇرلى سۋسىن دايىنداي الادى. وعان تەلەفون ارقىلى تاپسىرىس بەرەدى. كومپانيا وكىلدەرى مۇنداي قۇلتەمىرگە سۇرانىس ارتاتىنىنا سەنىمدى.

دجەري كولومبو، F -P Robotics AG كومپانياسىنىڭ وكىلى:

- «بارني» تولىقتاي اۆتوماتتاندىرىلعان. ول 16 ءتۇرلى سۋسىن دايىنداي الادى. قاجەت بولسا، ءتىپتى سىزبەن اڭگىمەلەسىپ، ازىلدەر دە ايتىپ بەرە الادى.

ال سينگاپۋر كوشەلەرىنەن «كامەللو» دەگەن روبوتتى كورۋگە بولادى. قۇلتەمىر تۇرعىنداردىڭ ينتەرنەت ارقىلى ساتىپ العان تاۋارلارىن ۇيىنە جەتكىزىپ بەرەدى. روبوت 40 كەلىگە دەيىن زات تاسي الادى. ول ءۇشىن اپپاراتقا سۋ وتكىزبەيتىن 2 جاشىك ورناتىلعان. بۇل قۇلتەمىر دە ازىرگە سىناقتان ءوتىپ جاتىر.

ليڭ تيڭ ميڭ، ينجەنەر: - بۇل تولىق اۆتوماتتاندىرىلعان روبوت. ول ءبىر جەردەن ەكىنشى جەرگە ازىق- تۇلىكپەن بىرگە وزگە دە زاتتاردى جەتكىزە الادى. تۇتىنۋشى ءوزىنىڭ تاۋارىن باقىلاي الۋى ءۇشىن ارنايى قوسىمشا دا جاساپ شىعاردىق. ياعني قۇلتەمىر قاي جەردە جۇرگەنىن قاشان كەلەتىنىن ءبىلىپ وتىرۋعا بولادى.

ال امەريكالىق «بوستون دايناميكس» كومپانياسى قويمالار مەن كولىكتەرگە جۇكتەردى تەز تيەپ تۇسىرەتىن روبوتتى تانىستىردى. بۇل قۇلتەمىردىڭ ارتىقشىلىعى ول قويمالاردا ەركىن قوزعالىپ، ءتۇرلى مىندەتتەردى اتقارا الادى. ماماندار مۇنداي روبوتتىڭ كەلەشەكتە قويما جۇمىستارىن جەڭىلدەتۋگە كومەگى كوپ بولار ەدى دەيدى.

24.kz