قازاقستاندىقتار رەسەيگە ءۇشىنشى ەلدەردەن ۇشىپ كەلە الادى

نۇر-سۇلتان. قازاقپارات - قازاقستاندىقتار رەسەيگە ءۇشىنشى ەلدەردەن ۇشىپ كەلە الادى.

بۇل تۋرالى قازاقپارات ق ر س ءى م telegram كانالىنا سىلتەمە جاساپ حابارلايدى.

مۇنداي ءتارتىپ رەسەي فەدەراتسياسى ۇكىمەتىنىڭ 2021-جىلعى 14 - ساۋىردەگى 963N وكىمىمەن قاراستىرىلعان.

ەندى قازاقستان ازاماتتارى رەسەيگە تۇراقتى اۋە قاتىناسىن قالپىنا كەلتىرگەن بارلىق ەلدەردىڭ رەيستەرىمەن ەشقانداي كەدەرگىسىز ۇشىپ كەلە الادى. قازىرگى ۋاقىتتا رەسەي كەلەسى ەلدەرمەن تۇراقتى جولاۋشىلار رەيستەرىن جۇزەگە اسىرادى: قازاقستان، ۇلى بريتانيا (2021-جىلدىڭ 1 - ماۋسىمىنا دەيىن توقتاتىلدى)، تانزانيا (بەلگىسىز مەرزىمگە توقتاتىلدى)، تۇركيا، شۆەيتساريا، مىسىر، مالديۆ ارالدارى، بىرىككەن اراب امىرلىكتەرى، قىرعىزستان، كورەيا رەسپۋبليكاسى، كۋبا، سەربيا، جاپونيا، سەيشەل ارالدارى، ەفيوپيا، ۆەتنام، ءۇندىستان، كاتار، فينليانديا، ازەربايجان، ارمەنيا، گرەكيا، سينگاپۋر، ۆەنەسۋەلا، گەرمانيا، سيريا، تاجىكستان، وزبەكستان، شري-لانكا.

ايتا كەتەيىك، بۇعان دەيىن ق ر ازاماتتارى قازاقستاننان رەسەيگە تىكەلەي اۋە رەيستەرىمەن عانا كەدەرگىسىز ۇشىپ كەلە الاتىن، ءۇشىنشى ەلدەر ارقىلى ۇشىپ كەلۋ وسى ەلدەردە تۇرۋعا ىقتيارحاتى بولعان جاعدايدا عانا مۇمكىن بولعان.

سونداي-اق، رەسەيگە كىرۋ كەزىندە شەتەلدىك ازاماتتارعا شەكارادان وتكەنگە دەيىن كەمىندە 72 ساعات بۇرىن بەرىلگەن پ ت ر ادىسىمەن COVID-19 تەستىنىڭ تەرىس ناتيجەسى بار انىقتاما قاجەت بولادى.