زەرتتەۋ: سپورتپەن اينالىسۋ ۆاكتسينانىڭ ەمىن ودان ءارى ارتتىرادى

نۇر-سۇلتان - قازاقپارات - سپورتپەن اينالىسۋ ادام يممۋنيتەتىن كۇشەيتىپ، قان اينالىمىن جاقسارتاتىنى بەلگىلى.

فيزيكالىق جاعىنان بەلسەندى ادام ۇزاق جاسايدى.

2008-جىلى The Lancet جۋرنالىندا جارىق كورگەن زەرتتەۋلەردىڭ بىرىندە جىل سايىن الەمدە 5 ميلليوننان استام ادام سپورتقا ەنجارلىعى مەن قيمىل-قوزعالىستان سىرت قالۋىنىڭ كەسىرىنەن قايتىس بولاتىنى ايتىلعان.

ال The Conversation باسىلىمىندا جارىق كورگەن جاڭا زەرتتەۋلەردە پاندەميا مەن ينفەكتسيالىق اۋرۋ تاراعان ۋاقىتتا سپورتپەن اينالىسۋدىڭ قانشالىقتى ماڭىزدى ەكەنى ايتىلعان. ۇنەمى سپورتپەن اينالىسۋ ادامنىڭ يممۋنيتەتىن جاقسارتىپ، جۇقپالى اۋرۋ مەن ينفەكتسيالىق ۆيرۋستاردى جۇقتىرۋ قاۋىپىن ءۇش ەسە ازايتىپ، ەكپە العان جاعدايدا، ونىڭ ەمىن ءتيىمدى ەتەتىن كورىنەدى.

بۇل زەرتتەۋگە الەمنىڭ 500 مىڭعا جۋىق ادامى قاتىسقان ەكەن. بۇدان شىققان قورىتىندى مىناۋ: كۇنىنە كەم دەگەندە 30 مينۋتىن جاتتىعۋ مەن سپورتقا ارناعان ادامنىڭ جۇقپالى اۋرۋعا شالدىعۋ قاۋپى 37 پايىزعا دەيىن ازاياتىن كورىنەدى.

سپورتپەن اينالىسۋ مەن قيمىل-قوزعالىستى كوبەيتۋدىڭ ارقاسىندا ادام اعزاسىندا IgA اتتى انتيدەنەنىڭ دەڭگەيى كوبەيىپ، يممۋنوگلوبۋليننىڭ قالىپتى مولشەرى قالىپتاسادى. ونداي انتيدەنە ادامنىڭ وكپەسى مەن باسقا دا ىشكى مۇشەلەرىنىڭ شىرىشتى قابىعىن قاپتايدى دا، ۆيرۋس پەن باكتەريا تۇسىرمەيتىن ارنايى قابات قۇرادى.

فيزيكالىق بەلسەندىلىك اعزادا T - جاسۋشانىڭ سانىن دا كوبەيتەتىن كورىنەدى. ال بۇل جاسۋشا ادامنىڭ يممۋن جۇيەسىنە جۇقپالى ۆيرۋس شابۋىلداعان كەزدە تەز قارسىلىق كورسەتۋىنە جاعداي جاسايدى.

عالىمداردىڭ ايتۋىنشا، سپورتپەن اينالىساتىن ادامنىڭ ەكپە سالدىرعاننان كەيىن انتيدەنە قالىپتاستىرۋ قۋاتى 50 پايىزعا دەيىن ارتادى ەكەن.

ال سپورتتىڭ مۇنداي پايداسى ءقازىر بۇكىل الەمدە ءجۇرىپ جاتقان ۆاكسيناتسيا كومپانياسىنىڭ جۇمىسىن جەڭىلدەتىپ، ءتيىمدى اسەرىن بىرنەشە ەسە وسىرمەك.

ءۇش سەبەپ

سپورتتىڭ اۋرۋدى جەڭۋگە كومەكتەسەتىنىن دالەلدەيتىن ءۇش سەبەپ بار.

بىرىنشىدەن، سپورتپەن اينالىساتىن ادامنىڭ قان اينالىمى جاقسى بولادى. ديابەت پەن باسقا دا جۇرەك جانە قان اۋرۋلارىنان اۋلاق بولادى. ال مۇنداي قۋاتتى اعزاعا رەسپيراتورلى جۇقپالى ۆيرۋستاردىڭ شابۋىل جاساۋىنا قاۋقارى جەتە قويمايدى.

ەكىنشىدەن، سپورتپەن اينالىساتىن ادام كۇيزەلىستەن اۋلاق بولادى. سوندىقتان سوزىلمالى اۋرۋعا شالدىعۋى دا ەكىتالاي. ال COVID-19 ينفەكتسياسىنان قايتىس بولعانداردىڭ كوبى - سوزىلمالى اۋرۋعا شالدىققاندار.

ۇشىنشىدەن، سپورتپەن اينالىساتىن ادامنىڭ يممۋنيتەتى جاقسى بولادى. جۇقپالى اۋرۋ يممۋنيتەتى قۋاتتى ادامنىڭ اعزاسىن ۋلاي المايدى.

massaget.kz