قاشاعان كەن ورنى تولىق يگەرىلۋگە ءتيىس – ق ر پرەزيدەنتى

None
None
نۇر- سۇلتان. قازاقپارات - قاشاعان كەن ورنى تولىق يگەرىلۋگە ءتيىس. بۇل تۋرالى اتىراۋ وبلىسىنىڭ الەۋمەتتىك- ەكونوميكالىق دامۋ ماسەلەلەرى جونىندەگى كەڭەستە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«اتىراۋ وبلىسى - ەلىمىزدەگى ەڭ ۇلكەن يندۋستريالىق ءوڭىردىڭ ءبىرى. ايماقتىڭ مۇناي- گاز ونەركاسىبى شەتەلدەن ينۆەستيتسيا تارتۋ سالاسىندا كوش باستاپ كەلەدى. سونداي- اق، قازاقستاننىڭ الەمدەگى ينۆەستيتسيالىق ءيميدجىن ارتتىرۋعا سەپتىگىن تيگىزۋدە. وبلىس رەسپۋبليكالىق بيۋدجەتكە جانە ۇلتتىق قورعا قوماقتى قارجى قۇيىپ وتىر. ۇكىمەت ءوڭىر اكىمدىگىمەن بىرلەسىپ، ءىرى مۇناي- گاز جوبالارىن ۋاقتىلى جۇزەگە اسىرۋدى باقىلاۋعا الۋعا ءتيىس. بولاشاقتا كەڭەيۋ جوباسىن ۋاقتىلى اياقتاۋ ماڭىزدى. سونداي- اق، قاشاعان كەن ورنى تولىق يگەرىلۋگە ءتيىس»، - دەدى مەملەكەت باسشىسى.

ق ر پرەزيدەنتىنىڭ اتاپ وتۋىنشە، سول ارقىلى ءبىر جىلدا وندىرىلەتىن مۇناي كولەمىن 15 ميلليون تونناعا ارتتىرۋعا بولادى. ناتيجەسىندە جۇمىس ورىندارى اشىلىپ، وتاندىق قىزمەت كورسەتۋ كومپانيالارى مەن شاعىن جانە ورتا بيزنەس وكىلدەرى ءۇشىن مول مۇمكىندىكتەر تۋادى.

«اقپاندا كونسەسسيونەر كومپانيالاردىڭ باسشىلارمەن كەزدەسۋ بارىسىندا 2021 -جىلدىڭ سوڭىنا دەيىن قاشانعاندى تولىق يگەرۋ جوسپارىن بەكىتۋ تاپسىردىم. ۇكىمەتكە بۇل ماسەلەنى باقىلاۋدى ۇستاۋدى جانە مەرزىمىنىڭ سوزىلىپ كەتۋىنە جول بەرمەۋدى وتىنەمىن»، - دەدى قاسىم- جومارت توقايەۆ.

اۆتور: مارلان جيەمباي

سوڭعى جاڭالىقتار