ۇكىمەت ەلدىڭ كولىك جانە ترانزيتتىك الەۋەتىن بارىنشا پايدالانۋ جونىندە ۇسىنىس ەنگىزۋى قاجەت – پرەزيدەنت
بۇل تۋرالى اتىراۋ وبلىسىنىڭ الەۋمەتتىك- ەكونوميكالىق دامۋ ماسەلەلەرى جونىندەگى كەڭەستە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«مەنىڭ تاپسىرماممەن ۇكىمەت جانە پرەزيدەنت اكىمشىلىگى جول ساپاسىنا قاتىستى جۇمىستاردا ايتارلىقتاي كەمشىلىك جىبەرگەن تۇلعالارعا قاتىستى كادرلىق شەشىم قابىلدادى. بۇل جۇمىس ۇكىمەت پەن اكىمدەردىڭ ۇنەمى باقىلاۋىندا بولۋى ءتيىس. جەرگىلىكتى دەڭگەيدەگى پروبلەمالار مەن كەمشىلىكتەردى تىڭعىلىقتى رەتتەۋ تالاپ ەتىلەدى جانە قاجەت بولعان جاعدايدى ءتيىستى شەنەۋنىكتەر جازالانسىن. ونسىز وڭ ناتيجەگە قول جەتكىزۋ مۇمكىن ەمەس»، - دەدى مەملەكەت باسشىسى.
ق ر پرەزيدەنتى جول قۇرىلىسى سالاسىنداعى ستاندارتتاردىڭ مۇلتىكسىز ساقتالۋىنا باقىلاۋدى كۇشەيتۋ بويىنشا كەشەندى ءىس- شارالار قابىلداۋ قاجەتتىگىن باسا نازار اۋدارتتى.
«سونداي- اق ۇكىمەتتەن ەلدىڭ كولىك جانە ترانزيتتىك الەۋەتىن بارىنشا پايدالانۋ جونىندە ۇسىنىس ەنگىزۋدى وتىنەمىن. ولار جول سالۋ جانە پايدالانۋ ماسەلەلەرىنە عانا قاتىستى بولماۋى ءتيىس. پروبلەمالاردىڭ بۇكىل كەشەنىن شەشۋ قاجەت. ونىڭ شەتەلدىك سەرىكتەستەرمەن كەلىسسوزدەر جۇمىسى، شەكارادان جىلدام ءوتۋ ماسەلەسى، جولدى پايدالانعانى ءۇشىن اقى الۋدى ەنگىزۋ بار. باسەكەلەستىك ارتىپ كەلەدى. ءبىر ورىندا تۇرىپ قالۋعا بولمايدى»، - دەدى قاسىم- جومارت توقايەۆ.
اۆتور: مارلان جيەمباي