اتىراۋ وبلىسىندا رەسەيمەن شەكاراداعى اۋىلدا جەدەل جاردەم بەكەتى اشىلدى

اتىراۋ. قازاقپارات - اتىراۋ وبلىسى رەسەيدىڭ استراحان وڭىرىمەن شەكتەسەدى.

ەكى ەل شەكاراسىنداعى قۇرمانعازى اۋدانىنىڭ كوتيايەۆ اۋىلىندا جەدەل جاردەم ستانساسىنىڭ قوسالقى بەكەتى اشىلدى، دەپ حابارلايدى قازاقپارات.

وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، بۇدان بىلاي قازاقستان-رەسەي شەكاراسى ماڭىندا جول-كولىك وقيعاسىنان زارداپ شەككەندەرگە، سونداي-اق اۋىل تۇرعىندارىنىڭ 1، 2 جانە 3-ساناتتاعى شاقىرۋلارىنا جەدەل مەديتسينالىق كومەك كورسەتىلەتىن بولادى.

قوسالقى مەديتسينالىق جەدەل جاردەم ستانساسى شۇعىل مەديتسينالىق كومەك كورسەتىلەتىن سانيتارلىق رەانيموبيلمەن قامتىلدى. ارنايى كولىك زارداپ شەككەندەرگە العاشقى مەديتسينالىق كومەك كورسەتۋ ءۇشىن قاجەتتى جابدىقتارمەن جابدىقتالعان.

جەدەل جاردەم بەكەتى راديۋسى 10-12 شاقىرىمدا ورنالاسقان كۋدرياشوۆ، جاستالاپ اۋىلى مەن پارومعا دەيىنگى اۋماقتى قامتيدى.

بەكەتتە تاۋلىك بويى 2 فەلدشەر مەن 1 جۇرگىزۋشى جۇمىس ىستەيدى. ال، ارنايى بريگادا تۇرعىندارعا كەشكى ساعات 17:00 دەن تاڭعى ساعات 9:00 گە دەيىن، سونداي-اق دەمالىس، مەرەكە كۇندەرى قىزمەت كورسەتەدى.

ەسكە سالا كەتەلىك، بۇعان دەيىن اتىراۋدا كوروناۆيرۋس جۇقتىرعان ناۋقاستاردىڭ جاعدايىن Call-ورتالىقتان بىلۋگە بولاتىنىن جازعان ەدىك.