قاراعاندى وبلىسىنىڭ كيەلى جەرلەرىنە ەكسكۋرسيالىق تۋرلار ۇيىمداستىرىلادى

قاراعاندى. قازاقپارات - حالىقارالىق ەسكەرتكىشتەر مەن تاريحي ورىنداردى قورعاۋ كۇنى جانە «يگى ىستەر مارافونى» جالپىۇلتتىق جوباسى اياسىندا قاراعاندى وبلىستىق تاريحي-ولكەتانۋ مۇراجايى تالدى ارحەولوگيالىق پاركىندە ەكوتۋر ۇيىمداستىردى.

ءىس-شارانى مادەنيەت، ارحيۆتەر جانە قۇجاتتاما باسقارماسى جانە تاريحي-مادەني مۇرانى ساقتاۋ ورتالىعى قولدادى، دەپ حابارلايدى قازاقپارات ءتىلشىسى.

شەت اۋدانىنداعى تالدى ارحەولوگيالىق پاركىنە جاستار رەسۋرستىق ورتالىعىنىڭ وكىلدەرى، وقىتۋشىلار، وقۋشىلار جانە مۇراجاي قىزمەتكەرلەرى اتتاندى. مۇندا ولار بىرەگەي تاريحي ەسكەرتكىشتەرمەن تانىسىپ قانا قويماي، ۇقىپسىز جەرلەستەرىنىڭ قالدىرعان قوقىستارىن تازالاي الدى.

تالدى ارحەولوگيالىق پاركى تاس، قولا ءداۋىرى، ەرتە تەمىر عاسىرى، ورتا عاسىر جانە ەتنوگرافيالىق قازىرگى زامان سياقتى بارلىق تاريحي كەزەڭدەرىنىڭ ەسكەرتكىشتەرىنىڭ شوعىرلانعان جەرى بولىپ تابىلادى.

قاراجارتاس قورىمىنداعى ەڭ ءىرى بەعازى-ءداندىباي كەسەنەسىن زەرتتەۋ ناعىز جاڭالىق بولدى.

ەسكەرتكىش پيراميدالىق-ساتىلى قۇرىلىم بولىپ تابىلادى جانە سىرتقى ءتۇرى بويىنشا مىسىر مەن اتستەك پيراميدالارىنا ۇقسايدى.

2017-جىلى جۇرگىزىلگەن قايتا قالپىنا كەلتىرۋ جۇمىستارى دالا پيراميداسىنىڭ كورىنىسىن قالپىنا كەلتىرۋگە مۇمكىندىك بەردى. قاراعاندى وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ قىزمەتكەرلەرى جانە ە. ا. بوكەتوۆ اتىنداعى قاراعاندى ۋنيۆەرسيتەتىنىڭ ارحەولوگ- عالىمدارى ساياباق قۇرۋ جوباسىن ازىرلەدى.

جوبا بويىنشا ارحەولوگيالىق زەرتتەۋلەر، قالپىنا كەلتىرۋ جانە كونسەرۆاتسيالاۋ جۇمىستارى جۇرگىزىلدى. پاركتە كۇزەت تاقتالارى مەن نىسانداردىڭ ورنالاسۋ ورىندارى كورسەتىلگەن. قازىرگى ۋاقىتتا تۋريستەر ءۇشىن قاجەتتى اقپاراتى بار ءۇش تىلدە QR- كودى بار باننەرلەردى ورناتۋ بويىنشا دايىندىق جۇمىستارى جۇرگىزىلۋدە.

الداعى ۋاقىتتا تالدى تاريحي-ارحەولوگيالىق پاركى بويىنشا ەكسكۋرسيالىق تۋرلار ازىرلەنىپ، سىناقتان وتكىزىلەدى، تۋريستىك جول سىلتەمەلەر شىعارىلادى.