تۇركىستان: ارماندار ورىندالاتىن قالا
ۇزدىكسىز سالىنىپ جاتقان قالا. ۇيلەر، قوناق ۇيلەر، كەڭسەلەر. مۇندا باقىت ءۇشىن قاجەتتىنىڭ ءبارى بار، دەپ حابارلايدى قازاقپارات.
مۇندا تاڭ اتىسىمەن ۇلتتىق مۋزىكامەن بىرگە وينايتىن سۋبۇرقاقتار بار. قوجا احمەت ياساۋي كەسەنەسىندە تىلەك تىلەپ، كيەلى عيماراتتى كورۋگە بولادى. اسپاندا قالىقتاپ تۇرعانداي كورىنەتىن تەاتردى دا جاقىننان كورۋ كەرەك. ەرەكشە ءدامدى تاعام. ساماۋىر شايى. كاۋاپ پەن سامسا. بارلىعى ماحابباتپەن دايىندالادى. سونىمەن بىرگە، قوناقتار تىلەكتەر قۇدىعىنا بارا الادى. شەلەكتى ءتۇسىرىپ، بۇلاق سۋىن ىشسەڭىز بولعانى، ءسىزدىڭ تىلەگىڭىز مىندەتتى تۇردە ورىندالادى.
تۇركىستان قوناقتارى بىرەگەي Farab كىتاپحاناسىنا دا كىرە الادى. مۇندا ءسىز تەك كىتاپ وقىپ قانا قويماي، 3D پرينتەردە كوشىرمەڭىزدى جاساي الاسىز. نەمەسە مۋزىكا جازا الاسىز. بۇل - ورتالىق ازياداعى تولىق سيكلدى جالعىز كىتاپحانا. وركەسترلىك شۇڭقىرى بار دراما تەاترى تۇركىستاندا 5 -قىركۇيەكتە ءوز جۇمىسىن باستايدى جانە پرەمەرا كورسەتەدى. ال ازىرگە جاس ارتىستەر بىردەن بىرنەشە قويىلىم دايىندايدى. تۇركىستانداعى وقۋشىلار سارايىنا كىرۋدى دە ۇمىتپاڭىز. جاس جەتكىنشەكتەر مۇندا قولونەر بۇيىمدارىن جاسايدى، سۋرەت سالۋدى جانە شاحمات ويناۋدى ۇيرەنەدى. كومپيۋتەرلىك ساۋاتىن ارتتىرادى. مۇعالىمدەر ءوز جۇمىسىن جاقسى كورەدى جانە ءوز شاكىرتتەرى تۋرالى اسقان قىزىعۋشىلىقپەن ايتادى.
ەتنواۋىلدا سەرۋەندەۋ دە وتە قىزىقتى بولماق. مۇندا ساداق اتۋدى ۇيرەنۋگە بولادى. سونداي- اق، جاقىندا قولونەرشىلەردىڭ قالاي جۇمىس ىستەيتىنىن دە كورۋگە بولادى. قوناقتار سازدان ىدىس جاساۋدى ۇيرەنۋى مۇمكىن. دەمالىس كۇندەرى ۇلتتىق كوستيۋمدەگى جاس سۇلۋلار بي بيلەيدى جانە ءان ايتادى. بۇل بۇكىل وتباسى ءۇشىن تاماشا دەمالىس ورنى بولماق.
ارينە، كەرۋەن سارايىنا بارۋدى دا ۇمىتپاڭىز. وندا قىز جىبەك پەن تولەگەننىڭ ماحاببات تۋرالى اڭىزىن، وت ەلەمەنتتەرى بار سۋ شوۋىن تاماشالاڭىز. كۇندىز جايلى كافەلەردە وتىرىپ، ءساندى دۇڭگىرشەكتەردە ساۋدا- ساتتىق جاساۋعا بولادى. سۋدىڭ جانىندا وتىرىپ جاي عانا ارمانداڭىز. تۇركىستاندا بارلىق ارمان ورىندالاتىن ءتارىزدى.
ايجان سەرىكجان قىزى