سەمەيدە يادرولىق مەديتسينا ورتالىعى اشىلدى
سەمەيدە ەڭ زاماناۋي تەحنولوگيالاردى قولدانا وتىرىپ، ونكولوگيالىق اۋرۋلاردى دياگنوستيكالاۋ جانە ەمدەۋگە ارنالعان قازاقستانداعى العاشقى يادرولىق مەديتسينا ورتالىعى اشىلدى.
⠀ «ورتالىقتىڭ ىسكە قوسىلۋى ءۇش كەزەڭدىك جوسپارعا سايكەس بىرتىندەپ جۇزەگە اسىرىلادى. ءبىرىنشى كەزەڭ اياسىندا جۇمىسقا راديويزوتوپتى دياگنوستيكا ءبولىمى كىرىپ وتىر. وندا ورناتىلعان وفەكت (ءبىر فوتوندى- ەميسسيالى كومپيۋتەرلى توموگرافيا) جانە كومپيۋتەرلى توموگرافپەن بىرىكتىرىلگەن وفەكت ماماندارعا ادام اعزاسىنداعى قاتەرلى دەرتتەردى باستاپقى ساتىسىندا انىقتاۋعا جانە باسقا دا پاتولوگيالاردى انىقتاۋعا مۇمكىندىك بەرەدى»، - دەپ حابارلادى ش ق و اقپارات ورتالىعى. ⠀
ءبىرفوتوندى ەميسسيالى كومپيۋتەرلى توموگرافيا - بۇل دياگنوستيكانىڭ زاماناۋي اقپاراتتىق ءادىسى. زەرتتەۋ 99mТс نەگىزىندەگى راديوفارمپرەپاراتتاردىڭ كومەگىمەن جۇزەگە اسىرىلادى.
⠀ «وفەكت جۇمىس پرينتسيپى - وبىر جاسۋشالارىن قاداعالاۋ. ويتكەنى، وزگەرىسكە ۇشىراعان جاسۋشالاردا، ءتىپتى ىسىك پايدا بولعانعا دەيىن زات الماسۋ قالىپتان تىس جۇرەدى. ولاردى انىقتاۋعا پاتسيەنتتىڭ قانىنا ەنگىزىلەتىن ارنايى پرەپاراتتار كومەكتەسەدى. بۇل اپپاراتتار كەز- كەلگەن ورگاننىڭ قىزمەت ەتۋ جاعدايىن جانە ادام اعزاسىنىڭ بۇكىل جۇيەسىن، ونىڭ ىشىندە قاننىڭ قوزعالۋ جىلدامدىعىن، ليمفالاردى، زات الماسۋدى زەرتتەۋگە مۇمكىندىك بەرەدى»، - دەلىنگەن مالىمەتتە.
ايتا كەتەيىك، وسىنداي راديويزوتوپتى دياگنوستيكا نۇر- سۇلتان قالاسىندا دا جۇرگىزىلەدى. ⠀
اۆتور: تالعاتجان مۇحامەتبەك ۇلى