ەلوردا: ورتالىق ازياداعى ەڭ ۇلكەن مەشىتتىڭ قۇرىلىسى قالاي ءجۇرىپ جاتىر

نۇر- سۇلتان. قازاقپارات - كەشە ەلوردا اكىمى التاي كولگىنوۆ ەل استاناسىندا سالىنىپ جاتقان ورتالىق ازياداعى ەڭ ۇلكەن مەشىتتىڭ قۇرىلىس بارىسىمەن تانىستى، دەپ حابارلايدى قازاقپارات قالا اكىمىنىڭ Instagram-داعى پاراقشاسىنا سىلتەمە جاساپ.

«قالادا رەسپۋبليكا مەن ورتالىق ازياداعى ەڭ ۇلكەن مەشىتتىڭ قۇرىلىسى ءجۇرىپ جاتىر. نەگىزگى كۇمبەزدىڭ بيىكتىگى شامامەن 90 مەتردى قۇرايدى، ال مۇنارالار 130 مەتر بيىكتىككە كوتەرىلەدى. مەشىتتىڭ سىيىمدىلىعى - 30 مىڭ ادام. قۇرىلىس ەلباسى نۇرسۇلتان نازاربايەۆتىڭ تاپسىرماسى بويىنشا دەمەۋشىلىك قاراجات ەسەبىنەن جۇرگىزىلۋدە. بۇگىن وسى مەشىتتىڭ قۇرىلىس بارىسىمەن تانىستىم. ول قابانباي باتىر مەن ماڭگىلىك ەل داڭعىلدارىنىڭ اراسىندا ورنالاسقان. ءوز تاراپىمىزدان ينجەنەرلىك جەلىلەر مەن كوممۋنيكاتسيالاردى تارتۋ جۇمىستارىن جۇرگىزەمىز. سونداي- اق اۋماقتى اباتتاندىرىپ، اعاش وتىرعىزامىز» دەلىنگەن جازبادا.

قالا باسشىسىنىڭ ايتۋىنشا، بۇل مەشىت ەلىمىزدىڭ تۇرعىندارى ءۇشىن عانا ەمەس، تۋريستەر ءۇشىن دە تارتىمدى نۇكتەگە اينالادى.

اۆتور: ەربول جانات