ش ق و: بيىل الاكولگە باراتىن تۋريستەر ءۇرجارعا ۇشاقپەن جەتە المايدى

وسكەمەن قازاقپارات - شىعىس قازاقستان وبلىسى ءۇرجار اۋدانىنا بيىل اۋە قاتىناسى توقتاتىلدى، دەپ حابارلايدى قازاقپارات ءتىلشىسى.

19-ساۋىردەن باستاپ اۋەجاي اۋقىمدى رەكونسترۋكتسيالاۋ جۇمىستارىن جۇرگىزۋ ماقساتىندا جابىلادى. ال الاكولگە باراتىن تۋريستەر ءۇشىن تەمىرجول جانە اۆتوبۋس رەيستەرىنىڭ سانى كوبەيتىلمەك. ايماق باسشىسى دانيال احمەتوۆ ءۇرجار اۋدانىنا جاساعان جۇمىس ساپارى بارىسىندا اۋە ايلاعىنداعى جوندەۋ جۇمىستارىمەن تانىستى. قازىر ۇشۋ-قونۋ جولاعىن رەكونسترۋكسيالاۋمەن بۇل باعىتتا جۇمىس تاجىريبەسى بار كومپانيا اينالىسۋدا. ونىڭ الدىنداعى مەردىگەر وزىنە جۇكتەلگەن مىندەتتەردى دۇرىس ورىنداماعان بولاتىن. اۋە قاتىناسىن ۇزبەۋ ءۇشىن ۋاقىتشا قونۋ جولاعىن سالۋ ۇسىنىلدى. الايدا ونىڭ قۇنى 5,6 ميلليارد تەڭگەنى قۇراپ وتىر.

بۇل قاراجات قولدانىستاعى جولاقتى جوندەۋگە جۇمسالىپ وتىرعان سومادان 1 ميلليارد تەڭگەگە قىمبات. وسى رەتتە وبلىس اكىمى مەملەكەتتىك بيۋدجەتتەن ارتىق شىعىندى بولدىرماۋ قاجەتتىگىن جەتكىزدى.

«دۇيسەنبىدەن باستاپ اۋەجاي جابىلادى. قۇرىلىس جۇمىستارى 3 اۋىسىمدا جۇرگىزىلەدى. نىسان مەنىڭ جەكە باقىلاۋىمدا. ەكى اپتادان كەيىن وسىندا تاعى كەلىپ، قۇرىلىستىڭ قالاي ءجۇرىپ جاتقانىن تەكسەرەمىن»، - دەدى دانيال احمەتوۆ.

اۆتور: تالعاتجان مۇحامەتبەك ۇلى