ەلوردادا جول بويىندا بولعان توبەلەس ءۇشىن جۇرگىزۋشىلەر جازالاندى

نۇر-سۇلتان. قازاقپارات - ەلورداداعى جول بويىندا بولعان توبەلەس ءۇشىن جۇرگىزۋشىلەر جازالاندى، دەپ حابارلايدى قازاقپارات نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

مونيتورينگ بارىسىندا بوگەنباي باتىر داڭعىلى بويىندا «گازەل» جانە «مەرسەدەس» ماركالى اۆتوكولىكتەرىنىڭ جۇرگىزۋشىلەرى اراسىندا بولعان توبەلەس فاكتىسى انىقتالدى.

جۇرگىزۋشىلەردىڭ ءبىر- بىرىنە جول بەرمەي، ەرسى ارەكەتتەر كورسەتۋى جانجالدىڭ تۋىنداۋىنا سەبەپ بولعان. توبەلەسكە قاتىسۋشىلاردىڭ بارلىعى انىقتالىپ، پوليتسياعا جەتكىزىلدى. اتالعان فاكتى بويىنشا «بۇزاقىلىق» بابى نەگىزىندە قىلمىستىق ءىس قوزعالدى.

نۇر-سۇلتان قالالىق پوليتسيا دەپارتامەنتى جۇرگىزۋشىلەردى قوعامدىق ءتارتىپتى بۇزباۋعا، اپاتتى جاعداي تۋعىزباۋعا جانە كولىك قۇرالدارىنىڭ قوزعالىسىنا كەدەرگى كەلتىرمەۋگە شاقىرادى.

اۆتور: اياۋلىم التىنبەك