اقمولا وبلىسىندا جەدەل جاردەم كولىگىنە وق اتقاندار انىقتالدى

كوكشەتاۋ. قازاقپارات - اقمولا وبلىسىندا جەدەل جاردەم كولىگىنە وق اتقان ادام انىقتالدى، دەپ حابارلايدى قازاقپارات ءتىلشىسى.

وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، شۋچينسك قالاسىندا جەدەل جاردەم اۆتوكولىگىنىڭ تەرەزەسىن زاقىمداعانداردى انىقتاۋ بويىنشا جەدەل- ىزدەستىرۋ شارالارى جۇرگىزىلدى. ونىڭ ناتيجەسى بويىنشا 17 جاستاعى كۇدىكتى مەن وقيعانىڭ ەكى كۋاگەرى انىقتالدى. ولاردىڭ بارلىعى شۋچە قالاسىنداعى كوللەدج ستۋدەنتتەرى.

«جاستاردىڭ ايتۋىنشا، 11-ساۋىردە كەشكى ساعات 22:00 شاماسىندا ولار كوپقاباتتى ءۇيدىڭ اۋلاسىندا پنيەۆماتيكالىق تاپانشادان مەتالل بوتەلكەلەرگە وق اتقان. وسى كەزدە اتقان وق كەزدەيسوق ءوتىپ بارا جاتقان جەدەل جاردەم كولىگىنىڭ تەرەزەسىنە تيگەن. جاستاردىڭ ءوتىپ بارا جاتقان اۆتوكولىككە وق اتۋ نيەتى بولماعان»، - دەيدى ۆەدومستۆودان.

ەسكە سالايىق، اتالمىش فاكتى بويىنشا، قىلمىستىق كودەكستىڭ 202-بابى «وزگەنىڭ مۇلكىنە زيان كەلتىرۋ نەمەسە جويۋ» بويىنشا قىلمىستىق ءىس قوزعالدى.