بالقاشتا جاڭا دەمالىس ورىندارى پايدا بولادى
07:26, 16 - ءساۋىر 2021
بالقاش. قازاقپارات - جىل سايىن بالقاشقا 80 مىڭنان استام تۋريست كەلەدى. بيىل وندا ەكى دەمالىس ايماعىن ىسكە قوسۋ جوسپارلانۋدا. قوسىمشا تاعى جەتى جاڭا تۋريستىك نىسان جابدىقتالۋدا، دەپ حابارلايدى قازاقپارات ءتىلشىسى.
وڭىرلىك كوممۋنيكاتسيالار قىزمەتى الاڭىندا وتكەن بريفينگىدە قالا اكىمى وراز تاۋىربەكوۆ بالقاشتاعى تۋريستىك سالانىڭ دامۋى تۋرالى ايتىپ بەردى.
وراز تاۋىربەكوۆتىڭ ايتۋىنشا، تۋريزم سالاسى - قالانىڭ الەۋمەتتىك- ەكونوميكالىق دامۋىنىڭ ماڭىزدى سالالارىنىڭ ءبىرى. تۋريستەرگە دەمالىس ايماقتارىنا جايلى جەتۋ ءۇشىن «جۇمىسپەن قامتۋدىڭ جول كارتاسى» اياسىندا جولداردىڭ ورتاشا جوندەۋدەن ءوتتى. توراڭعىلىققا دەيىنگى اۆتوماگيسترال، توراڭعىلىق جانە شۇبارتۇبەك كەنتتەرىنىڭ ىشىندە، بەرتىس شىعاناعىنىڭ ماڭىندا جوندەلدى. بالقاش كۋرورتتىق ايماعىنا بالقاش قالاسى، توراڭعىلىق جانە شۇبارتۇبەك كەنتتەرى كىرەدى. مۇندا دەمالۋعا ارنالعان 47 ورىن بار. جەرگلىكتى بيلىك ءتۋريزمدى ودان ءارى دامىتۋدى جوسپارلاپ وتىر.