سۋ قۇيىلعان پلاستيك بوتەلكە ادامعا قانشالىقتى زيان؟

None
None
نۇر-سۇلتان. قازاقپارات - قازىر اۋىز سۋ وندىرۋشىلەردىڭ كوبى سۋسىندى شىنى بوتەلكەگە ەمەس، پلاستيك بوتەلكەگە قۇيىپ ساتادى.

ويتكەنى بۇل شىنىعا قاراعاندا ارزان ءارى ءوندىرۋ وڭاي. ەگەر شىنى بوتەلكەمەن سۋ ساتسا، سۋدىڭ باعاسى قىمباتتاپ كەتەدى دەسەدى.

قالاي دەسەك تە، قازىر سۋ مەن سۋسىننىڭ كوبى پلاستيك بوتەلكەگە قۇيىلىپ ساتىلادى. ال بۇل ادام اعزاسىنا قانشالىقتى زيان؟

پلاستيك بوتەلكەنى جاساۋ ءۇشىن قولدانىلاتىن پلاستماسسانىڭ ءتۇرى كوپ ءبىراق نەگىزگى قولدانىلاتىن ماتەريال - بۇل پوليەتيلەنتەرەفتالات (ياعني، پەت). شىنى سياقتى ءمولدىر، جەڭىل پلاستيك ءتۇرى. ازىق-تۇلىك، اس-تاعاممەن رەاكسياعا تۇسە المايتىن حيميالىق بولشەك. سوندىقتان قاۋىپسىز سانالادى. ءبىراق كوپشىلىك پ ە ت-تەن جاسالعان بوتەلكەلەردى ەكىنشى رەت قولدانۋعا بولمايدى دەسەدى. ويتكەنى قاتەرلى ىسىكتىڭ تۋۋىنا سەبەپ بولۋى مۇمكىن.

پلاستيكا بوتەلكەنىڭ قۇرامىنداعى تاعى ءبىر حيميالىق زات - بۇل بيسفەنول ا (د ف پ). بۇل قوسپا جايلى ءبىرازىمىز ەستىگەن بولارمىز. پلاستماسسا وندىرىسىندە قولدانىلىپ كەلە جاتقانىنا جارتى عاسىر بولعان.

الايدا 2010-جىلى دۇنيەجۇزىلىك دەنساۋلىق ساقتاۋ ۇيىمى بيسفەنول ا- نى ادام دەنساۋلىعىنا زيان حيميالىق زات دەپ مالىمدەگەن. اسىرەسە ادامنىڭ ەندروكريندى جۇيەسىنە كەرى اسەر ەتىپ، ۇرپاق قالدىرۋ قابىلەتىن ناشارلاتۋى مۇمكىن دەگەن قورىتىندىعا كەلەدى. ءبىراق پ ە ت- تەن جاسالاتىن بوتەلكەلەردە بيسفەنول ا بولمايدى. ونىڭ قۇرامىندا جوق.

ال پ ە ت- ءتى جاساۋعا نەگىزىنەن سۋرما سىندى حيميالىق ەلەمەنت قولدانىلادى. سۋرما كانتسەروگەن (قاتەرلى ىسىك تۋدىراتىن زات) ەمەس. ءبىراق ىشكە ءتۇسىپ كەتسە، ديارەيا تۋعىزىپ، قۇستىرۋى مۇمكىن.

2008-جىلى جۇرگىزىلگەن ا ق ش عالىمدارىنىڭ زەرتتەۋىندە پلاستيك بوتەلكەنىڭ قۇرامىنداعى سۋرمانىڭ ۇلەسى 6 ppb (ميللياردتىڭ ءبىر بولشەگى) شاماسىنا جەتسە، ادام دەنساۋلىعىنا زيان تيگىزۋ مۇمكىن دەگەن قورىتىندىعا كەلگەن. الايدا قالىپتى بوتەلكەنىڭ ءوزى ءۇش اي بويى 22 گرادۋس جىلى جەردە جاتتى دەگەننىڭ وزىندە سۋرمانىڭ ۇلەسى 0,226 ppb-تەن اسا قويمايدى.

ءبىراق بوتەلكە شىجىپ تۇرعان كۇننىڭ استىندا قالىپ، زيانى شەكتەن اسۋى مۇمكىن. ماسەلەن 60 گرادۋس ىستىقتا سۋداعى سۋرمانىڭ ۇلەسى 6 ppb شاماسىنا 176 كۇندە جەتەدى. ءبىراق 80 گرادۋس ىستىقتا نەبارى 36 ساعاتتا جەتەدى ەكەن. بوتەلكەدەگى سۋدىڭ مۇنداي ىستىقتا سونشاما ۋاقىت جاتۋى ەكىتالاي.

پلاستيك بوتەلكەنىڭ قۇرامىنداعى تاعى ءبىر قوسپا بار. ول - ميكروپلاستيك. بوتەلكەگە سۋ قۇيىلعان كەزدە، كوپ جاعدايدا (93 پايىز) ميكروپلاستيك سۋعا ارالاسىپ كەتەدى ەكەن. ءبىراق ونىڭ دەنساۋلىققا زيانى جايلى قازىر عىلىمدا ەش دەرەك جوق. عالىمدار قانشا زەرتتەۋ جۇرگىزگەنىمەن، دەنساۋلىققا زيان تۇسىن تابا المادى.

massaget.kz

سوڭعى جاڭالىقتار