ەلباسى اسقار مامين مەن ءاليحان سمايىلوۆتى قابىلدادى
كەزدەسۋدە «Nur Otan» پارتياسىنىڭ ءتوراعاسىنا «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىن ىسكە اسىرۋعا باعىتتالعان جول كارتاسى اياسىندا اتقارىلىپ جاتقان جۇمىستار تۋرالى اقپارات ۇسىنىلدى.
پارتيانىڭ ساياسي كەڭەسى بيۋروسىنىڭ مۇشەسى، پرەمەر-مينيستر ا. مامين سايلاۋالدى باعدارلاما ەلىمىزدە جۇزەگە اسىرىلىپ جاتقان رەفورمالاردىڭ جالعاسى ەكەنىن ايتتى.
ول پارتيانىڭ الدىنا اۋقىمدى ءارى ناقتى ماقساتتار قويعانىن، ونى باعىندىرۋعا قاجەتتى بارلىق رەسۋرس جەتكىلىكتى ەكەنىن اتاپ ءوتتى. سونداي-اق قازاقستاننىڭ تۇڭعىش پرەزيدەنتىنە 2021-جىلدىڭ ءبىرىنشى توقسانىنداعى الەۋمەتتىك-ەكونوميكالىق دامۋ قورىتىندىسى، ۇكىمەتتىڭ جاھاندىق داعدارىس جاعدايىندا ۇلتتىق ەكونوميكانىڭ ءوسۋ قارقىنىن ساقتاۋ جۇمىستارى تۋرالى باياندالدى.
العاشقى توقساننىڭ قورىتىندىسى بويىنشا ەكونوميكانىڭ نەگىزگى سالالارىنداعى كورسەتكىشتەر بىرتىندەپ جاقسارا باستاعانى ايتىلدى.
ماسەلەن، وڭدەۋ ونەركاسىبىندە (7,5+ پايىز)، قۇرىلىس (13,1+ پايىز) پەن اۋىل شارۋاشىلىعىندا (2,8+ پايىز) ءوسىم بار ەكەنى اتاپ ءوتىلدى. سونداي-اق ماشينا جاساۋ (21,8+ پايىز)، فارماتسيەۆتيكا (9,1+ پايىز)، حيميا ونەركاسىبى (14,2+ پايىز)، مەتاللۋرگيا (2,3+ پايىز)، جەڭىل ونەركاسىپ (3,1+ پايىز) پەن وتاندىق ەكونوميكانىڭ باسقا دا ءبىرقاتار سالالارىندا ءوسۋدىڭ وڭ قارقىنى بايقالۋدا.
تاۋ-كەن مەتاللۋرگيا سەكتورىن قوسپاعاندا، نەگىزگى كاپيتالعا سالىنعان ينۆەستيتسيالار كولەمى 34 پايىزعا ارتتى. وسىنىڭ ءبارى ءى ج و- ءنىڭ بولجانعان ناقتى ءوسىمىن 2021-جىل قورىتىندىسى بويىنشا 2,8 پايىزدان 3,1 پايىزعا دەيىن ارتتىرۋعا مۇمكىندىك بەردى. ينفلياتسيا 4-6 پايىز ارالىعىندا بولادى دەپ بولجانىپ وتىر.
سونداي-اق ۇكىمەت باسشىسى ناقتىلانعان رەسپۋبليكالىق بيۋجەت جوباسى تۋرالى باياندادى. ونىڭ شىعىستارى «Nur Otan» پارتياسىنىڭ 2021-2025-جىلدارعا ارنالعان سايلاۋالدى باعدارلاماسىن، ەلباسىنىڭ ستراتەگيالىق باستامالارىن جانە مەملەكەت باسشىسىنىڭ جولداۋىن ىسكە اسىرۋدى قامتاماسىز ەتۋگە باعىتتالعان.
سونىمەن قاتار قارجىلاندىرۋ COVID-19 ىندەتىنە قارسى اۋقىمدى كۇرەس ءىس-شارالارىن جۇزەگە اسىرۋعا، دەنساۋلىق ساقتاۋ جۇيەسىن جاڭعىرتۋعا، مەملەكەتتىڭ جۇرتشىلىق الدىنداعى الەۋمەتتىك مىندەتتەمەلەرىن ورىنداۋعا، سونداي-اق نەگىزگى مەملەكەتتىك باعدارلامالاردى ىسكە اسىرۋعا باعىتتالادى.
ەلباسى ەل ەكونوميكاسىنداعى كورسەتكىشتەردى جاقسارتۋ ءۇشىن جۇيەلى جۇمىس اتقارۋدىڭ ماڭىزدىلىعىنا توقتالدى. - ەكونوميكانىڭ نەگىزگى كورسەتكىشتەرى قالپىنا كەلىپ جاتقانىن كورىپ وتىرمىز.
بۇل جاقسى ءۇردىس. ماشينا جاساۋدا ءوسىم شامامەن 22 پايىزدى قۇرادى. جەڭىل ونەركاسىپ تە قارقىندى دامىپ كەلەدى. جالپى وڭدەۋ ونەركاسىبى، قۇرىلىس سەكتورى، اگروونەركاسىپتىك كەشەن مەن باسقا دا ءبىرقاتار سالالاردا ءوسىم بار، - دەدى قازاقستاننىڭ تۇڭعىش پرەزيدەنتى.
اڭگىمە بارىسىندا سانيتارلىق-ەپيدەميولوگيالىق احۋالدى تۇراقتاندىرۋ جانە ۆاكتسينا سالدىرعان ازاماتتاردىڭ سانىن كوبەيتۋگە باعىتتالعان جۇمىستار جايلى ايتىلدى.
ەلباسى جۇرتشىلىق اراسىندا ۆاكتسينا سالۋدىڭ ءمان-ماڭىزى تۋرالى اقپاراتتىق-ءتۇسىندىرۋ جۇمىستارىن جۇرگىزۋدىڭ ماڭىزدىلىعىن اتاپ ءوتتى.
- دەنساۋلىقتى كۇتۋ كەرەك. بەتپەردە تاعىپ، قولدى ءجيى جۋىپ جۇرگەن ءجون، كوپشىلىك شارالارعا بارماۋ، مىندەتتى تۇردە ەكپە سالدىرۋ وتە ماڭىزدى. سوندا عانا وسى كۇردەلى كەزەڭنەن وتە الامىز، - دەدى نۇرسۇلتان نازاربايەۆ.