ايەلدەر كۇرەسىنەن ازيا چەمپيوناتى: قازاقستان قۇراماسى العاشقى كۇنى ەكى التىن الدى

نۇر-سۇلتان. قازاقپارات - الماتى قالاسىندا كۇرەس تۇرلەرىنەن ءوتىپ جاتقان ازيا چەمپيوناتىندا ايەلدەر اراسىندا بۇگىن بەس سالماقتا جەڭىمپاز-جۇلدەگەرلەر انىقتالدى، دەپ حابارلايدى قازاقپارات ءتىلشىسى.

قازاقستاندىقتار، توكيو وليمپياداسى جولداماسىنىڭ يەگەرلەرى ۆالەنتينا يسلاموۆا-بريك پەن ەلميرا سىزدىقوۆا وزدەرىنىڭ بابىندا ەكەندىگىن تانىتا ءبىلدى.

ۆ. يسلاموۆا- بريك 50 كەلىگە دەيىنگى سالماقتا قارسىلاس شاق كەلتىرگەن جوق. ول فينالدا وزبەكستاندىق جاسمين يممايەۆانى دا مەرزىمىنەن بۇرىن جەڭىپ، التىننان القا تاقتى.

ريو وليمپياداسىنىڭ قولا جۇلدەگەرى ە. سىزدىقوۆا 76 كەلى سالماقتا العاشقى بەلدەسۋىندە قىرعىزستاندىق ايپەرى مەدەت قىزىنا 1:6 ەسەبىمەن ەسە جىبەرىپ قويدى.

دەگەنمەن ول ءوز توبىندا ەكىنشى ورىنمەن جارتىلاي فينالعا، ودان كەيىن سوڭعى باسەكەگە جولداما الدى. فينالدا ەلميرانى تاعى دا ا. مەدەت قىزى كۇتىپ تۇردى.

بۇل جولى قازاقستاندىق بالۋان قارسىلاسىنان ايلاسىن اسىرىپ، تازا جەڭدى. تاعى ءبىر قازاقستاندىق ايشا ءۋاليحان 55 كەلىگە دەيىنگى سالماقتا قولا جۇلدەگەر اتاندى.

وسىلايشا ايەلدەر اراسىندا جارىستىڭ العاشقى كۇنى قازاقستان قۇراماسى ەكى التىن، ءبىر قولا مەدالعا قول جەتكىزدى. ەرتەڭ تاعى بەس سالماقتا مىقتىلار انىقتالادى.

بيىل ازيا بىرىنشىلىگىنە قىتاي مەن جاپونيا قۇرامالارى قاتىسىپ جاتقان جوق. سوندىقتان باسقا ەلدەردىڭ بالۋاندارىنا كوماندالىق ەسەپتە توپ جارۋعا مۇمكىندىك تۋىپ تۇر.