پرەزيدەنت تۇركىستان جانە پاۆلودار وبلىستارى اكىمدەرىنىڭ ەسەبىن تىڭدادى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ تۇركىستان جانە پاۆلودار وبلىستارىنىڭ اكىمدەرىمەن وڭىرلەردە قالىپتاسقان قازىرگى سانيتارلىق-ەپيدەميولوگيالىق جانە الەۋمەتتىك-ەكونوميكالىق احۋال تۋرالى تەلەفون ارقىلى سويلەستى.

بۇل تۋرالى پرەزيدەنتتىڭ باسپا ءسوز حاتشىسى بەرىك ۋالي Facebook-تەگى پاراقشاسىندا جازدى، دەپ حابارلايدى قازاقپارات.

تۇركىستان وبلىسىنىڭ اكىمى پرەزيدەنتكە كوروناۆيرۋستىڭ تارالۋى بويىنشا ءوڭىردىڭ قازىرگى تاڭدا «جاسىل» ايماقتا ەكەنىن جانە 35 مىڭ تۇرعىننىڭ ۆاكسينا العانىن باياندادى. قاسىم-جومارت توقايەۆقا جاڭا ساۋران اۋدانىن قۇرۋ جۇمىستارىنىڭ بارىسى تۋرالى مالىمەت بەرىلدى.

ءومىرزاق شوكەيەۆتىڭ ايتۋىنشا، قازىر جاڭا اكىمدىكتىڭ باسقارۋ جۇيەسى مەن بيۋجەتى بەكىتىلۋدە. جۋىق ارادا قۇقىق قورعاۋ ورگاندارى مەن مينيسترلىكتەردىڭ جەرگىلىكتى بولىمشەلەرى جۇمىس ىستەي باستايدى.

جاڭادان قۇرىلىپ جاتقان اۋداننىڭ حالقى 100 مىڭنان اسادى، جالپى اۋماعى 650 مىڭ گەكتارعا جۋىق. اۋداننىڭ اكىمشىلىك ورتالىعى شورناق اۋىلى. سونىمەن قاتار اڭگىمەلەسۋ بارىسىندا ەلەكتر قۋاتىنىڭ اپاتتىق جاعدايدا سونۋىنەن بولعان زارداپتاردى قالپىنا كەلتىرۋ، كوكتەمگى سۋ تاسقىنىنىڭ الدىن الۋ جانە ەگىس ناۋقانىنا سۋدىڭ جەتىسپەۋشىلىگى پروبلەماسىن شەشۋ ماسەلەلەرىنە باسا ءمان بەرىلدى. پاۆلودار وبلىسىنىڭ اكىمى ءابىلقايىر سقاقوۆ تا پرەزيدەنتكە كوروناۆيرۋس ىندەتىنە قارسى جۇرگىزىلىپ جاتقان كۇرەس شارالارى جايىندا ەسەپ بەردى.

ءوڭىر باسشىسىنىڭ ايتۋىنشا، قازىرگى ۋاقىتتا ءوڭىر «سارى» ايماقتا.

13 - ساۋىردەگى مالىمەت بويىنشا وبلىسقا «سپۋتنيك V» ۆاكتسيناسىنىڭ ءبىرىنشى كومپونەنتىنىڭ 21750 جانە ەكىنشى كومپونەنتىنىڭ 10750 مولشەرى جەتكىزىلگەن. جالپى 19 مىڭنان استام ادامعا ەكپە ەگىلىپ، 4100 ازامات ۆاكتسينانىڭ ەكىنشى كومپونەنتىن سالدىرعان.

سونىمەن قاتار قاسىم-جومارت توقايەۆقا كوكتەمگى ەگىس ناۋقانىنا دايىندىق جۇمىستارىنىڭ بارىسى تۋرالى باياندالدى. اكىمنىڭ ايتۋىنشا، بيىل 1,490 مىڭ گەكتار جەرگە ەگىستىك سالۋ جوسپارلانعان.

بۇل بىلتىرعى كورسەتكىشتەن 59 مىڭ گەكتارعا ارتىق.

مەملەكەت باسشىسى وبلىس اكىمدەرىنە وڭىرلەردەگى سانيتارلىق-ەپيدەميولوگيالىق احۋالدى تۇراقتاندىرۋعا جانە ازاماتتاردى ۆاكسينالاۋ جۇمىستارىن جانداندىرۋعا قاتىستى ءبىرقاتار ناقتى تاپسىرما بەردى.