كوروناۆيرۋس جۇقتىرۋشىلاردىڭ تاۋلىكتىك ءوسىمى رەكوردتىق كورسەتكىشكە جەتتى
وتكەن تاۋلىكتە ەلدە كوروناۆيرۋستىڭ جاڭا ءتۇرىن جۇقتىرۋدىڭ 200739 جاعدايى تىركەلدى.
بۇل - پاندەميا باستالعالى ءۇندىستاندا ءبىر كۇن ىشىندە تىركەلگەن ينفەكتسيا جۇقتىرۋشىلاردىڭ ەڭ جوعارى كورسەتكىشى. ەلدە اۋرۋعا شالدىعۋشىلار سانىنىڭ ءوسىمى وسىمەن 36 كۇن بايقالۋدا.
ءۇندىستاندا ۆيرۋس جۇقتىرۋشىلاردىڭ جالپى سانى 14 ميليوننان استى. ەل استاناسى نيۋ-دەليدە وننان استام قوناق ءۇي مەن بانكەت زالدارىن اۋرۋحانالار جانىنداعى COVID-19 ورتالىقتارىنا اينالدىرۋ جوسپارلانۋدا. سونداي-اق مۋمبايدا ۆيرۋستىڭ تارالۋىن تەجەۋ بويىنشا جاڭا شارالار قابىلداندى.
قالانىڭ كوپتەگەن كاسىپورىندارى مەن قوعامدىق ورىندارى جابىلدى، ادامداردىڭ ءجۇرىپ-تۇرۋىنا 15 كۇنگە شەكتەۋ قويىلدى. سونىمەن قاتار ەلدىڭ دەنساۋلىق ساقتاۋ مينيسترلىگى سوڭعى تاۋلىكتە كوروناۆيرۋستان بولعان 1038 ءولىم جاعدايى تۋرالى حابارلادى.
COVID-19 ۆيرۋسىنان كوز جۇمعانداردىڭ جالپى سانى - 173123 ادام. ءۇندىستان اۋرۋ جۇقتىرۋشىلاردىڭ جالپى سانى بويىنشا الەمدە ا ق ش- تان كەيىنگى ەكىنشى ورىندا. ال كوروناۆيرۋستان بولعان ءولىم جاعدايلارىنىڭ سانى بويىنشا ا ق ش، برازيليا مەن مەكسيكادان كەيىنگى ءتورتىنشى ورىندا.