پرەزيدەنت ەلىمىزدىڭ الەۋمەتتىك- ەكونوميكالىق دامۋ ماسەلەلەرى جونىندە كەڭەس وتكىزدى

نۇر- سۇلتان. قازاقپارات - مەملەكەت باسشىسى ەلىمىزدىڭ الەۋمەتتىك- ەكونوميكالىق دامۋ ماسەلەلەرى جونىندە كەڭەس وتكىزدى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

پرەزيدەنت قاسىم- جومارت توقايەۆتىڭ توراعالىعىمەن وتكەن جيىندا ەل دامۋىنىڭ جاڭارتىلعان بولجامى جانە رەسپۋبليكالىق بيۋدجەتتى ناقتىلاۋ جونىندەگى ۇسىنىستار تالقىلاندى. وتىرىسقا پرەمەر- مينيستر اسقار مامين، پرەزيدەنت اكىمشىلىگىنىڭ باسشىسى ەرلان قوشانوۆ، ۇلتتىق بانك ءتوراعاسى ەربولات دوسايەۆ جانە باسقالار قاتىستى. وتىرىس بارىسىندا ۇكىمەت الەۋمەتتىك- ەكونوميكالىق دامۋعا قاتىستى بولجامدارىن جانە الەمدىك ەكونوميكاداعى احۋالدى، تاۋار نارىعىنداعى ۇردىستەردى ەسكەرە وتىرىپ، وسى جىلعا ارنالعان رەسپۋبليكالىق بيۋدجەتتى ناقتىلاۋ جونىندەگى ۇسىنىستارىن، سونداي- اق، بيىلعى 1 -توقساننىڭ الدىن الا قورىتىندىلارىن ۇسىندى.

اتاپ ايتقاندا بيىل ىشكى جالپى ءونىمنىڭ ناقتى ءوسىمى بەكىتىلگەن كورسەتكىشتەن 0,3 پايىزعا ارتىپ، % 3,1 دەڭگەيدە بولادى دەپ بولجانۋدا. ينفلياتسيا دەڭگەيى % 4-6 ارالىعىندا ساقتالىپ وتىر. بيۋدجەتتى ناقتىلاۋدىڭ نەگىزگى مىندەتى - مەملەكەت باسشىسىنىڭ جولداۋىندا ايتىلعان تاپسىرمالاردى ورىنداۋ جانە پارتيانىڭ سايلاۋالدى پلاتفورماسىن جۇزەگە اسىرۋ. وسىعان بايلانىستى بيۋدجەتتىڭ كىرىسىندە دە، شىعىسىندا دا ءوسىم بولادى دەپ كۇتىلۋدە.

اۆتوموبيل جولدارىن دامىتۋعا، «اۋىل - ەل بەسىگى» جوباسىن ودان ءارى ىسكە اسىرۋعا، ەكونوميكانىڭ نەعۇرلىم زارداپ شەككەن سالالارىنداعى كاسىپكەرلىك سۋبەكتىلەرىن قولداۋعا، «جۇمىسپەن قامتۋدىڭ جول كارتاسىن» جۇزەگە اسىرۋعا جانە اگروونەركاسىپتىك كەشەندى دامىتۋعا قوسىمشا قاراجات بولىنەتىن بولادى. پاندەميامەن كۇرەسكە بولىنەتىن قوسىمشا قارجى دارىگەرلەرگە ۇستەمەاقى جانە مەديتسينالىق قىزمەتتەردىڭ اقىسىن تولەۋگە جۇمسالادى. سونىمەن قاتار اسكەري قىزمەتشىلەردى تۇرعىن ۇيمەن قامتاماسىز ەتۋگە، سۋ تاسقىنىنا قارسى ءىس- شارالارعا، سۋمەن قامتاماسىز ەتۋ جانە سۋ تارتۋ جۇيەلەرىنىڭ قۇرىلىسى مەن ولاردى جاڭعىرتۋعا قارجى ءبولۋ جوسپارلانعان.

جيىن قورىتىندىسى بويىنشا پرەزيدەنت قاسىم- جومارت توقايەۆ بيۋدجەت شىعىندارىن وڭتايلاندىرىپ، كىرىسىن ارتتىرۋ، مەملەكەتتىك ساتىپ الۋ جۇيەسىن جەتىلدىرۋ، ينفراقۇرىلىم مەن سيفرلاندىرۋدى دامىتۋ، سونداي- اق، جەكەشەلەندىرۋدىڭ كەشەندى جوسپارى اياسىندا مەملەكەتتىڭ ەكونوميكاداعى ۇلەسىن ازايتۋ جۇمىستارىن جانداندىرۋ جونىندە تاپسىرما بەردى.