قازاقستان، قىتاي، موڭعوليادان كەلگەن قازاقتار توكيودا ۇلتتىق ورتالىق اشتى

توكيو. قازاقپارات - قازىرگى ۋاقىتتا جاپونيادا تۇراقتى نەگىزدە جۇمىس ىستەپ جاتقان جانە ءبىلىم الىپ جۇرگەن قازاقستان رەسپۋبليكاسىنىڭ 191 ازاماتى، سونداي- اق قىتاي، موڭعوليا جانە وزبەكستاننان كەلگەن 70-كە جۋىق ەتنيكالىق قازاق تۇرادى.

ەندى ولار بىرلەسىپ، ءوز ۇيىمدارىن قۇرىپ وتىر، دەپ حابارلايدى قازاقپارات «وتانداستار قورىنا» سىلتەمە جاساپ.

جاپونياداعى قازاقتار قاۋىمداستىعىنىڭ ءتوراعاسى بولىپ «Juntendo» ۋنيۆەرسيتەتىنىڭ كلينيكاسىندا حيرۋرگ بولىپ جۇمىس ىستەيتىن قانداس ابدىبەك قالىبەك سايلاندى. بۇگىن «وتانداستار قورى» ك ە ا ق جانە جاپونيا قازاقتارى قاۋىمداستىعى ءوزارا ىنتىماقتاستىق تۋرالى مەموراندۋمعا ونلاين رەجيمدە قول قويدى. مەموراندۋم اياسىندا مادەني- گۋمانيتارلىق جوبالاردى ىسكە اسىرۋ، كاسىپكەرلەر اراسىندا ءوزارا بايلانىستى جولعا قويۋ جانە اقپاراتتىق قولداۋ جۇمىستارى جوسپارلانۋدا.

ءىس- شاراعا ق ر جاپونياداعى توتەنشە جانە وكىلەتتى ەلشىسى ەرلان باۋداربەك- قوجاتايەۆ جانە وسى ەلدە تۇراتىن ەتنيكالىق قازاقتار، وقىپ جاتقان ستۋدەنتتەر دە قاتىستى.

«وتانداستار قورىنىڭ» ۆيتسە- پرەزيدەنتى ماعاۋيا سارباسوۆ ءوز سوزىندە شەتەلدەگى وتانداستارمەن بايلانىستاردى كەڭەيتۋدىڭ ماڭىزدىلىعىن اتاپ ءوتىپ، ولاردىڭ تىلدىك جانە ەتنومادەني بىرەگەيلىگىن ساقتاۋعا ىقپال ەتەتىن قوعام باعدارلامالارى تۋرالى حاباردار ەتتى. تاراپتار قازاق ءتىلىن وقىتۋ بويىنشا قىسقا مەرزىمدى كۋرستاردى جۇزەگە اسىرۋعا، قازاقستاننىڭ جوعارى وقۋ ورىندارىندا قازاق بالالارىنىڭ ءبىلىم الۋىنا جان- جاقتى قولداۋ كورسەتۋگە، قازاق قولونەرىن دامىتۋ جانە ىلگەرىلەتۋ باعىتىندا قولداۋدى قامتاماسىز ەتۋگە، جاپونيا جانە قازاقستان كاسىپكەرلەرىمەن كەزدەسۋلەر، سەمينارلار، كونفەرەنسيالار جانە بيزنەس- فورۋمدار ۇيىمداستىرۋعا كومەك كورسەتۋگە كەلىستى.