الماتىداعى ءال- فارابي داڭعىلىندا ەرەكشە كوپىر سالىنادى
بۇل تۋرالى الماتى اكىمدىگىنىڭ 2022 -جىلعا دەيىنگى دامۋ جونىندەگى جاڭا تانىستىرىلىمىندا ايتىلدى، دەپ حابارلايدى قازاقپارات ءتىلشىسى.
اكىمدىك مالىمەتىنە سۇيەنسەك، جاياۋ جۇرگىنشىلەر كوپىرى جاسىل جەلەكتى قالىپتاستىراتىن قالاداعى جاڭا سيمۆولعا اينالادى. كوپىر باقتىڭ جالعاسى بولادى. ونىڭ ۇزىندىعى - 350 مەتر، ال جاياۋ ءجۇرۋ باعىتى - شامامەن ءبىر شاقىرىم.
«قالانىڭ وزىندىك ەرەكشەلىگىن قالىپتاستىراتىن جاڭا بىرەگەي ۇسىنىس بار. 2010 -جىلى ءال- فارابي داڭعىلىنىڭ جوعارى جاعىندا سپورت كەشەنى سالىندى. سپورت كەشەنىنىڭ جانىندا ەسەنتاي وزەنى، بوتانيكالىق باق، ۋنيۆەرسيتەت، دۇكەندەر، بيزنەس ورتالىقتار، كلاستەرلەر سياقتى ماڭىزدى نىساندار ورنالاسقان. سول سەبەپتى، سپورت كەشەنى اۋماعىندا جاڭا رەكرەاتسيالىق ايماق قۇرۋ ۇسىنىلادى. بۇل ايماق شامامەن 60 گەكتاردى قۇرايدى»، - دەپ اتاپ ءوتتى قالالىق جاسىل ەكونوميكا باسقارماسىنىڭ باسشىسى ناتاليا ليۆينسكايا.
جاڭا قوعامدىق كەڭىستىكتەردى جوبالاۋ وسى جىلدىڭ سوڭىنا دەيىن، ىسكە اسىرۋ كەلەسى جىلعا جوسپارلانعان. ءال- فارابي داڭعىلىمەن بىرگە ەسەنتاي وزەنىنىڭ كورىنىسى دە وزگەرەدى. مۇندا كوپىر استىنداعى كەڭىستىكتى جانە جاعالاۋ ايماعىن اباتتاندىراتىن پاركۋر ورنىن قۇرۋ جوسپارلانعان. اكىمدىكتىڭ الدىندا ۇلكەن الماتى وزەنى ارناسىن اباتتاندىرۋ بويىنشا ماڭىزدى جوسپارلار تۇر.
اۆتور: الما مۇقانوۆا