قازاقستاندا بالا تۋۋ كورسەتكىشى بويىنشا رەكورد تىركەلدى
ساراپشىلاردىڭ ايتۋىنشا، قازاقستاندا 2020 -جىلى تۋعان نارەستەلەر سانى بويىنشا جاڭا رەكورد ورناعان: بىردەن 460 مىڭعا جۋىق بالا دۇنيەگە كەلدى. بۇرىن بۇل كورسەتكىش «تۇراقتى تۇردە 400 مىڭعا جۋىق بولعان».
سونىمەن قاتار، ساراپشىلار ءبىلىم الۋ ماسەلەسىن دە كوتەردى.
«بۇل بالانىڭ بارىنە التى-جەتى جىلدان كەيىن مەكتەپ كەرەك بولادى. بارلىق ىقتيمال تەتىكتەردى جىلدام قوسىپ، ينۆەستورلار مەن قۇرىلىس سالۋشىلاردى ىنتالاندىرمايتىن بولسا، قازاقستاننىڭ ءبىلىم بەرۋ جۇيەسىندەگى جاعداي ناشارلايدى.
دەموگرافيالىق جانە كوشى-قون پروتسەستەرىن ەسكەرسەك، قالالاردا ورتا ءبىلىم بەرۋ ينفراقۇرىلىمىنىڭ جەتىسپەۋشىلىگىنە بايلانىستى جاعداي ناشارلاۋى مۇمكىن. مىسالى، 2025 -جىلعا قاراي ورىن تاپشىلىعى شامامەن 670 مىڭ بولادى»، - دەپ پايىمدايدى ساراپشىلار.
ءبىلىم جانە عىلىم مينيسترلىگى مالىمەتى بويىنشا، بۇگىندە قازاقستاندا 7429 مەكتەپ جۇمىس ىستەيدى، وندا 3,4 ميلليونعا جۋىق وقۋشى وقيدى. ونىڭ ىشىندە 137 مەكتەپ - ءۇش اۋىسىمدى، تاعى 34 مەكتەپ اپاتتى جاعدايدا، دەلىنگەن پرەمەر- ءمينيستردىڭ رەسمي رەسۋرسىندا.
Рrimeminister.kz دەرەكتەرى بويىنشا، بىلتىر ەلىمىزدىڭ بارلىق 17 ءوڭىرى بويىنشا ورىن تاپشىلىعى 168 مىڭنان اسقان. سونىمەن قاتار، «اتامەكەن» ۇ ك پ ادامي كاپيتالدى دامىتۋ دەپارتامەنتىنىڭ ديرەكتورى ءلاززات شونايەۆا 2021 -جىلى وقۋشى ورىندارىنىڭ تاپشىلىعى 264,8 مىڭ دەپ مالىمدەدى.
بۇل ساندار ەلدە مەكتەپتەردىڭ جەتىسپەيتىندىگىن كورسەتەدى، دەيدى ماماندار.