پاندەميا كەزىندە تۇرعىنداردىڭ تاۋعا بارۋى ءتورت ەسەگە ارتتى - باقىتجان ساعىنتايەۆ
قالانىڭ قۇرىلىس ساياساتىنىڭ ماڭىزدى بولىگى - ورتالىقتىڭ تاريحي كەلبەتىن ساقتاۋ. بۇل ءوز كەزەگىندە تۋريستەردى قىزىقتىرۋعا اسەر ەتەدى. تاريحي ورتالىقتا عيماراتتاردىڭ قاسبەتتەرىن جوندەۋ مەن قالپىنا كەلتىرۋ بويىنشا كەشەندى جۇمىس اياسىندا 156 دان استام ءۇيدىڭ قاسبەتى قايتا قالپىنا كەلتىرىلدى. 2021-جىلى 70 قاسبەتتى جوندەۋ جوسپاردا.
«پاندەميا كەزىندە تۇرعىنداردىڭ تاۋعا بارۋى دا ءتورت ەسەگە ارتقاندىقتان، ازاماتتارعا قولجەتىمدى بولۋى ءۇشىن تۋريستىك قوعامدىق كەڭىستىكتەر قۇرۋ جۇمىستارى جۇرگىزىلۋدە. وتكەن جىلى تاۋلى جەرلەردە 4 ۆيزيت-ورتالىق سالىندى، 1000 شاقىرىم جاياۋ جۇرگىنشى جولى سيفرلاندىرىلدى، 500 شاقىرىم جول اباتتاندىرىلدى. بيىل قوسىمشا 172 شاقىرىم تاۋ باعىتتارى اباتتاندىرىلادى»، - دەدى باقىتجان ساعىنتايەۆ.
تاۋلى جەرلەردە قاۋىپسىزدىكتى قامتاماسىز ەتۋ بويىنشا وزگە دە جوبالار پىسىقتالىپ جاتىر. بيىل تاۋدا تۋريستەر باعىتتان ءجيى اداسىپ، ۇيالى بايلانىس ناشار ۇستايتىن 14 قاۋىپتى ايماق جابىلدى.
سونداي-اق تاۋدا قۇتقارۋشىلار پۋلتىنە اپات سيگنالدارىن بەرۋ ءۇشىن قوسىمشا 10 راديوجۇيەلىك قۇرىلعى ورناتىلادى.