قازاقستاندا ۆاكسينانىڭ قانشا دوزاسى قالدى؟

نۇر-سۇلتان. قازاقپارات - ق ر دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ ەلىمىزدە ۆاكسينانىڭ قالعان قانشا دوزاسى بار ەكەنىن ايتتى، دەپ حابارلايدى قازاقپارات ءتىلشىسى.

«بۇگىندە ۆاكتسينانىڭ شامامەن 480 مىڭ دوزاسى بار. ۆاكسيناتسيا كولەمىنە بايلانىستى ءاربىر ادام ءۇشىن ارناۋلى كۇندەلىكتى جوسپار ازىرلەنگەن. سوعان وراي وڭىرلەردەن ءتيىستى اقپاراتتى كۇندەلىكتى جيناپ وتىرامىز. قازىرگى ۋاقىتتا جاقسى قارقىن الدىق، تاۋلىگىنە شامامەن 50 مىڭ ۆاكسينا سالىنادى. بۇل جوعارى شەك ەمەس»، - دەدى ءبىرىنشى ۆيتسە-مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا.

مارات شورانوۆتىڭ دەرەگىنشە، وسى ايدىڭ سوڭىنا دەيىن 910 مىڭ دوزا، باسقا وندىرۋشىلەردىڭ 500 مىڭ دوزاسى جانە 25 مىڭ «QazVac» ۆاكسيناسىن جەتكىزۋ كۇتىلەدى. بۇل ەلدىڭ شامامەن 2 ميلليون ازاماتىنا ۆاكسيناتسيالاۋدىڭ قولجەتىمدىلىگىن قامتاماسىز ەتەدى.