ۆاكسينا وندىرۋمەن نەلىكتەن ءبىلىم مينيسترلىگى اينالىسادى
بۇل ساۋالعا ق ر دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ جاۋاپ بەردى، دەپ حابارلايدى قازاقپارات ءتىلشىسى.
«ۆاكسينانى ازىرلەۋشى ينستيتۋت ءبىلىم مينيسترلىگىنە قاراستى ۇيىم سانالادى. سوندىقتان ءبىز، دەنساۋلىق ساقتاۋ جۇيەسى رەتىندە اتالعان ۆاكسينانىڭ تيىمدىلىگىن باقىلاۋعا جانە ولاردى نارىققا جىبەرۋگە قاتىسامىز. بۇل جالپى الەمدىك تاجىريبە سانالادى. دەنساۋلىق ساقتاۋ مينيسترلىگىنىڭ قۇزىرەتىن ءوندىرۋ كىرمەيدى»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا.
ءبىرىنشى ۆيتسە-مينيستر قازاقستاندىق ۆاكسينانى شىعارۋعا دەنساۋلىق ساقتاۋ مينيسترلىگى قانداي كومەك كورسەتەتىندىگىن دە ايتىپ بەردى.
«دارىلىك زاتتاردى ساراپتاۋ ورتالىعىمىز كلينيكالىق سىناقتىڭ بارلىق ساتىسىندا ساراپتاما جۇرگىزىپ، ناتيجەسىندە ساراپشىلىق قورىتىندى بەرەدى. كوميسسيا قورىتىندىسى جاسالادى. سودان كەيىن اتالعان پرەپاراتتى مەديتسينالىق-فارماتسيەۆتيكالىق باقىلاۋ كوميتەتىندە تىركەۋ جۇرگىزىلەدى»، - دەدى مارات شورانوۆ.
اۆتور: مارلان جيەمباي