تۇركىستان وبلىسىندا كوروناۆيرۋس جۇقتىرعان ايەل بوساندى
ول سايرام اۋداندىق ينفەكسيالىق اۋرۋحاناسىنا جۇكتىلىكتىڭ 39 اپتاسىندا ج ر ۆ ي سيمپتومدارىمەن امبۋلاتورلىق قابىلداۋعا جەتكىزىلگەن. سىناما ناتيجەسى ونىڭ كوروناۆيرۋس ينفەكسياسىن جۇقتىرعانىن كورسەتتى. ايى -كۇنى تولىپ، تولعاعى قىسقان ايەل مەن ونىڭ ءسابيىنىڭ ءومىرىن امان الىپ قالۋ ءۇشىن شۇعىل تۇردە بىلىكتى دارىگەرلەردىڭ قاتىسۋىمەن ارنايى كونسيليۋم وتكىزىلگەن. ايەل امان-ەسەن تۇڭعىشىن دۇنيەگە اكەلدى. نارەستەنىڭ سالماعى 3 كەلى 400 گرامم. ودان بىردەن كوروناۆيرۋسقا سىناما الىندى. جاڭا تۋعان ۇل بالا اناسىنان وقشاۋلاندىرىلدى. تەست قورىتىندىسى نارەستەنىڭ بويىنان COVID-19 ينفەكسياسىنىڭ تابىلماعانىن كورسەتتى. مامانداردىڭ ايتۋىنشا، ءسابيدىڭ جاعدايى جاقسى. جەكە بوكستا، دارىگەرلەردىڭ ءجىتى باقىلاۋىندا. اناسىنىڭ دا جاعدايى ءبىرقالىپتى.
ايتا كەتەيىك، بىلتىر وڭىردە كورونوۆيرۋس ينفەكسياسىن جۇقتىرعان 122 جۇكتى ايەل امان-ەسەن بوسانعان. تۇركىستان وبلىسىندا جىل باسىنان بەرى 15 مىڭعا جۋىق ءسابي دۇنيەگە كەلگەن. 2020 -جىلى وڭىردە 61274 نارەستە تۋىلعان. تۇركىستان وبلىسى بالا تۋۋ كورسەتكىشى بويىنشا ەلىمىزدە كوش باستاپ تۇر.