قازاقستاندىق ۆاكسينانىڭ ارتىقشىلىقتارى قانداي

نۇر-سۇلتان. قازاقپارات – ق ر ب ع م بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا قازاقستاندىق ۆاكسينانىڭ ارتىقشىلىقتارىن ايتىپ بەردى، دەپ حابارلايدى قازاقپارات ءتىلشىسى.

«وتاندىق ۆاكسينانىڭ پارامەترلەرى بويىنشا مىنانى مالىمدەيمىن: ۆاكسينا سەنىمدى، ۋاقىتشا ازىرلەۋ تەحنولوگياسىمەن تەكسەرىلگەن. ونداعى بارلىق كومپونەنتتەر سوڭعى 60 جىل ىشىندە زەرتتەلگەن جانە قاۋىپسىز. جاڭا كومپونەنت - بۇعان دەيىن ايتقانىمىزداي، SARS- CoV-2 ۆيرۋسىنىڭ ءوزى. ءبىزدىڭ تەحنولوگيامىزداعى ۆيرۋس حيميالىق جولمەن «ولتىرىلگەن» (يناكتيۆتەندىرىلگەن). يممۋندىق رەاكسيانى كۇشەيتۋ ءۇشىن وعان اديۋۆانت (اليۋمينيي تۇزدارى) قوسىلادى»، - دەدى ك. زاكاريا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سپيكەر كوروناۆيرۋسقا قارسى قازاقستاندىق ۆاكسينانى ازىرلەۋدەگى تەحنولوگيانىڭ ارتىقشىلىقتارىن اتادى.

«ۆاكسينانى ازىرلەۋدەگى يناكتيۆتەندىرىلگەن تەحنولوگيانىڭ ارتىقشىلىعى - تەحنولوگيا جىلدار بويى تەكسەرىلگەن، بارلىق كومپونەنتتەر سەنىمدى جانە قاۋىپسىز. ولار ۆاكسينامەن بايلانىسقان اۋرۋلاردى تۋدىرمايدى جانە گۋمورالدى، جاسۋشالىق يممۋنيتەتتى سەنىمدى تۇردە قوزدىرادى. ايىرىقشا ەرەكشەلىكتەرى - كۇردەلى تەحنيكانى، كۇردەلى توڭازىتقىش قوندىرعىلاردى تالاپ ەتپەيتىن جەتىلدىرىلگەن جەتكىزۋ ادىستەرى بار جانە توڭازىتقىشتا پليۋس 2-8 گرادۋس تەمپەراتۋرادا تاسىمالدانادى»، - دەپ ءتۇسىندىردى ع ز ي باس ديرەكتورى.

سونىمەن بىرگە، ك. زاكاريا ەكى كومپونەنتپەن ەگىلگەننەن كەيىنگى اعزاداعى انتيدەنەلەردىڭ قۇرامى بويىنشا الدىن الا دەرەكتەردى باياندادى.

«كلينيكالىق زەرتتەۋلەردىڭ ءبىرىنشى جانە ەكىنشى فازالارىنىڭ ناتيجەسى بويىنشا QazCOVID-in ۆاكسيناسىن العان ادامداردا ءبىرىنشى ۆاكسينادان كەيىن 2-دەن 16-عا دەيىنگى تيتردە ۆيرۋستى بەيتاراپتاندىراتىن انتيدەنەلەردىڭ پايدا بولۋى بايقالادى. ەكىنشى ۆاكسينادان كەيىنگى دەڭگەي تۇراقتى وسۋدە. ورتاشا گەومەتريالىق تيتر - 99,5. وسىلايشا، قازاقستاندىق ۆاكسينانىڭ جوعارى يمۋننوستيمۋلياتسيالىق بەلسەندىلىگىن كورۋگە بولادى»، - دەدى كۇنسۇلۋ زاكاريا.