وتاندىق ۆاكسينا نە سەبەپتى تۇركيادا قۇيىلۋى مۇمكىن

نۇر-سۇلتان. قازاقپارات – ق ر ب ع م بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا قازاقستاندىق ۆاكسينانىڭ نە سەبەپتى وزگە ەلدە قۇيىلۋى مۇمكىن ەكەنىن ءتۇسىندىردى، دەپ حابارلايدى قازاقپارات ءتىلشىسى.

سپيكەرگە «وتاندىق ۆاكسينانى نە سەبەپتى تۇركيادا قۇيۋعا، قاپتاما جاساۋعا ءماجبۇرمىز؟ قاراعاندىدا ۆاكسينانىڭ رەسەيلىك نۇسقاسىن سول پروتسەستەن وتكىزىپ جاتقان جوق پا؟» دەگەن سۇراق قويىلدى.

«ينستيتۋتتىڭ نەگىزگى ماقساتى - ۆاكسينانى ازىرلەپ شىعارۋ. بۇگىنگى كۇنى زاۋىت قازاقستاندا ءالى جوق، زاۋىتىمىز سوعىلىپ جاتىر. قاراعاندىعا كەلسەك، بۇل جەردە كەلەسى ايىرماشىلىق بار: ءبىزدىڭ يناكتيۆتەلگەن ۆاكسينامىز تازا ۆيرۋستان پايدا بولادى، سودان جاسالادى. ول ەكىنشى توپ پاتوگەندىككە جاتادى. ەكىنشى توپقا جاتاتىن پاتوگەندى ۆيرۋسپەن قالانىڭ نە ۇلكەن مەگاپوليستىڭ ىشىندە جۇمىستاردى وتكىزۋگە بولمايدى.

«سپۋتنيك- V» تەحنولوگياسىنا كەلسەك، ونىڭ ىشىندە نەگىزگى زات ءبىزدىڭ SARS- CoV ۆيرۋسى ەمەس، ۆيرۋستىڭ ىشىندەگى كىشكەنە عانا اقۋىز، ونى تاسىمالدايتىن ادەنوۆيرۋس ۆيرۋلەنتتىگى ءتورتىنشى توپقا جاتادى. ءتورتىنشى توپقا جاتاتىن ۆيرۋستارمەن قالا ىشىندە جۇمىس ىستەۋگە بولمايدى. ال ەندى تۇركيا نەمەسە باسقا زاۋىتتا تولتىرۋ ماسەلەسى ناقتى شەشىلگەن جوق. بىزگە ۇكىمەت قاي جەرگە اپارىپ، ازىرلەۋ كەرەك دەسە، سول جەرگە بارىپ ازىرلەيمىز. ونىڭ سەبەبىن باسىندا ايتتىم، ۇلكەن كولەمدەگى ۆاكسينالاردى بىزدە قۇياتىن «الاڭ» جوق»، - ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.