قازاقستاندا قوجا احمەت ياساۋي تۋرالى تەلەحيكايا كورسەتىلەدى
تۇركيا تاراپى تۇسىرگەن بۇل تەلەحيكايا «ماۆەرا» دەپ اتالادى. ماۆەرا - (اراب تىلىندە «كورىنەتىن الەمنىڭ كورىنبەيتىن ارعى جاعى» دەگەن ماعىنانى بىلدىرەدى) كونە وسمانلى تىلىندە قولدانىلعان ءسوز. قازاقشا «تىلسىم الەم»، «قارسى جاق»، «باسقا دۇنيە» دەپ اۋدارۋعا بولادى. رەجيسسەر يۇدجەل حۇداۆەردىنىڭ بۇل فيلمى تارتىمدى ءارى قىزىقتى وقيعالارعا تولى.
ياساۋي تۋرالى تەلەحيكايانى تۇرىكتەر جاڭا فورماتتا تۇسىرگەن. وندا قوجا احمەت ءومىرىنىڭ كوپشىلىك بىلە بەرمەيتىن قىرلارى، جالپاق جۇرتقا بەيمالىم كەزەڭى كوبىرەك سۋرەتتەلەدى. سوندىقتان دا بۇل تەلەحيكايا قازاقستان كورەرمەندەرى ءۇشىن دە قىزىقتى بولارى حاق.
تەلەحيكايادا ياساۋيدىڭ ارىستانباپتان العان قۇرما دانەگىنىڭ قۇرما اعاشىنا اينالۋ وقيعاسى، دارۋىشتەر حيكاياسى، تاريحتاعى العاشقى الىپ- ەرەندەر وقيعاسى تارتىستى بەرىلەدى.
ەستەرىڭىزگە سالا كەتسەك، ق ر اقپارات جانە قوعامدىق دامۋ ءمينيسترى ايدا بالايەۆانىڭ تاياۋداعى تۇركياعا جۇمىس ساپارى بارىسىندا قوجا احمەت ياساۋي ءومىرى تۋرالى تەلەسەريال پرەمەراسىن قازاقستان مەن تۇركيادا ءبىر مەزگىلدە كورسەتۋ تۋرالى ۋاعدالاستىققا قول جەتكىزىلگەن بولاتىن. سونىمەن قاتار ەكى ەل اراسىندا تۇركى جۇرتىنا ورتاق تاريحي تۇلعا - قورقىت اتا تۋرالى بىرلەسكەن سەريال تۇسىرۋگە ۋاعدالاستىق جاسالعان ەدى.
اۆتور: مارلان جيەمباي