باسپانا باعاسى تۇپكىلىكتى تۇراقتانادى - قايىربەك وسكەنبايەۆ

نۇر- سۇلتان. قازاقپارات - يندۋستريا جانە ينفراقۇرىلىمدىق دامۋ ءبىرىنشى ۆيتسە- ءمينيسترى قايىربەك وسكەنبايەۆ تۇرعىن ءۇي باعاسى قاشان تۇراقتاناتىنىن ايتتى، دەپ حابارلايدى قازاقپارات ءتىلشىسى.

«ءبىز اپتا سايىن جىلجىمايتىن مۇلىك باعاسىن باقىلاپ وتىرامىز. جاڭا باعدارلاما ەنگىزىلگەننەن كەيىن تۇرعىن ءۇي باعاسى كوتەرىلە باستادى. باستاپقى نارىقتاعى تۇرعىن ءۇي قۇنى قاڭتاردا 3 پايىزعا، قايتالاما نارىقتاعى تۇرعىن ءۇي 17 پايىزعا قىمباتتادى. ناۋرىزدا باعانىڭ ءوسۋى توقتادى. ءبىرىنشىسى 0,5 پايىزعا، ال ەكىنشىسى ەكى پايىزعا قىمباتتادى. ءساۋىر مەن مامىر ايلارىندا ءوسىم توقتايدى، ال ماۋسىم مەن شىلدەدە باعالار تۇراقتانادى دەپ ويلايمىز»، - دەدى ۆيتسە- مينيستر.

دەگەنمەن، «وتباسى بانك» ا ق باسقارما ءتوراعاسى باعالارعا جۇرگىزىلگەن تالداۋ الەم بويىنشا قۇرىلىستا پايدالانىلاتىن شيكىزات پەن ماتەريالدار باعاسىنىڭ وسكەنىن كورسەتتى دەپ وتىر. «جىلجىمايتىن مۇلىكتىڭ وزىندىك باعاسىندا ەڭبەك رەسۋرستارىنىڭ قۇنى وتە ۇلكەن ۇلەسكە يە. قازاقستانداعى ورتاشا جالاقى ستاتيستيكاسىنا قاراساق، 2020 -جىلدىڭ ءتورتىنشى توقسانىنىڭ قورىتىندىسى بويىنشا 233136 تەڭگە بولدى. بۇگىن رەسمي ستاتيستيكا شىقتى. ءبىرىنشى توقساننىڭ قورىتىندىسى بويىنشا نومينالدى ورتاشا جالاقى شامامەن 11 پايىزعا ءوستى. تيىسىنشە، كرانشىلاردىڭ، مونوليت قۇياتىن قىزمەتكەرلەردىڭ، ارلەۋشىلەردىڭ ەڭبەگى جىلجىمايتىن مۇلىكتىڭ باستاپقى نارىعىنا اسەر ەتەدى. ءبىز ءوز تاراپىمىزدان تالداۋ جۇرگىزىپ، جىلدىڭ ەكىنشى جارتىسىندا، بۇعان دەيىن بولجاعانىمىزداي، مامىردىڭ سوڭى مەن ماۋسىمنىڭ باسىنان باستاپ باعا نارىعى تۇراقتانادى دەپ ويلايمىز»، - دەدى بانك ءتورايىمى.

اۆتور: ەسىمجان ناقتىباي