اتالىق جانە انالىق ۇرىقتىڭ جالعىز ءبىر عانا بازاسى بولۋى كەرەك - بەكبولات تىلەۋحان
«اتا- بابالارىمىز سالت- ءداستۇردى بەرىك ۇستانىپ، جەسىرىن قاڭعىتپاعان، جەتىمىن جىلاتپاعان. جالپى العاندا، قان ماسەلەسىنە قاي زاماندا دا نەمقۇرايلى قاراماعان. ءتىپتى، ارعى اتاسىن بىلمەگەندى «جەتى اتاسىن بىلمەگەن - جەتەسىز» دەپ سوككەن. وسى ورايدا ەكودونور ماسەلەسىن كوتەرمەكپىن»، - دەپ توقتالدى دەپۋتات ءماجىلىستىڭ جالپى وتىرىسىندا ۇكىمەت باسشىسىنىڭ ورىنباسارى ەرالى توعجانوۆتىڭ اتىنا جولداعان ساۋالىندا.
بۇل تۇرعىدا ول زاڭ بويىنشا 35 جاسقا دەيىنگى ەر ادام انونيمدى تۇردە دونور بولا الاتىنىن ەسكە سالدى. دەنى ساۋ، دەنە ءبىتىمى قالىپتى دامىعان، گەنەتيكالىق ساراپتاماسى جاقسى بولسا اتالىق ۇرىعىن تاپسىرا الادى. قانشا رەت تاپسىراسىز ءوز ەركىڭىز. شەكتەۋ جوق. انكەتادا ءجۇزى، رۋى، بويى، سالماعى، ماماندىعى كورسەتىلەدى، بولدى. كەيىننەن، كاتالوگتان كوڭىلىنە قونعان ادامدى تاڭداپ الادى. ستاتيستيكاعا سەنسەك، جىل سايىن تەك ءبىر كلينيكادا ءدال وسى جولمەن 70 بالا دۇنيەگە كەلەدى ەكەن. بۇل - ەرتەڭ ەلىمىزدىڭ تۇكپىر- تۇكپىرىندەگى قانشاما وتباسىندا ءبىر اكەدەن تارايتىن ءبىراز ۇل- قىز بويجەتىپ، ەرجەتىپ شىعادى دەگەن ءسوز. ودان كوپ بولۋى دا مۇمكىن. ولار بىلمەستىكتەن ءبىر- بىرىنە ۇيلەنۋى مۇمكىن. ءبىر اكەدەن تاراعان جانداردىڭ ءبىر- بىرنە ۇيلەنۋىنىڭ الدىن الۋ ءۇشىن، اۋرۋ بالالاردىڭ سانىن ازايتۋ ءۇشىن بۇل ماسەلە وتە ماڭىزدى دەپ ويلايمىز»، - دەدى ب. تىلەۋحان.
وسى ورايدا ول بولاشاق ۇرپاقتىڭ دەنساۋلىعىن جانە تەكسىزدىكتەن ساقتاۋ ماقساتىندا ءتيىستى ۇسىنىستار جاسادى.
«قازاقستان بويىنشا اتالىق جانە انالىق ۇرىقتىڭ جالعىز ءبىر عانا بازاسى بولۋى كەرەك. دونورلار دا تەك سول ورتالىققا تاپسىرىپ، بارلىعى تەك سول ورتالىقتان عانا الىپ وتىرۋدى جۇيەلەۋ قاجەت. ەكىنشىدەن، ءبىر رەتتەن ارتىق دونور بولۋعا رۇقسات ەتپەۋ كەرەك. ءبىر دونوردىڭ ۇرىعىن ەكى ادامنان ارتىققا قولدانباۋدى، بارىنشا اشىقتىقتى ساقتاۋدى قاتاڭ تۇردە رەتتەۋدى ۇسىنامىن»، - دەدى بەكبولات تىلەۋحان.
اۆتور: رۋسلان عابباسوۆ