نۇرلى جەر باعدارلاماسى بويىنشا سالىناتىن پاتەر سانى كوبەيەتىن بولدى
يندۋستريا جانە ينفراقۇرىلىمدىق دامۋ ءبىرىنشى ۆيتسە- ءمينيسترى قايىربەك وسكەنبايەۆ ورتالىق كوممۋنيكاتسيالار قىزمەتىندە وتكەن بريفينگىدە «نۇرلى جەر» باعدارلاماسىنىڭ جوسپارىنا ەنگىزىلگەن وزگەرىستەر تۋرالى مالىمەت بەردى.
«اعىمداعى جىلى «نۇرلى جەر» باعدارلاماسىنداعى جوسپارلى 15,2 ميلليون شارشى مەتردىڭ ورنىنا 17 ميلليون شارشى مەتر تۇرعىن ءۇي سالۋدى مىندەتىمىزگە الىپ وتىرمىز. جىل سوڭىندا 163 مىڭ وتباسىنىڭ تۇرعىن ءۇي جاعدايىن جاقسارتىپ، ونىڭ ىشىندە مەملەكەتتىك قولداۋ ەسەبىنەن 43,5 مىڭ كەزەكتە تۇرعان جانۇيا باسپانامەن قامتىلاتىن بولادى. ياعني، ولارعا 22,5 مىڭ الەۋمەتتىك تۇرعىنجاي جانە 21,0 مىڭ جەڭىلدەتىلگەن قارىز بەرىلەتىن بولادى»، - دەدى ۆيتسە- مينيستر.
«اعىمداعى جىلدىڭ 1 توقسانىنىڭ قورىتىندىسى بويىنشا قۇرىلىس سالاسىندا ەنگىزىلگەن لوكداۋندارعا قاراماستان دامۋدىڭ وڭ سەرپىنى بايقالادى. قۇرىلىس- مونتاج جۇمىستارىنىڭ كولەمى وتكەن جىلمەن سالىستىرعاندا % 13,1 - عا ارتتى. قۇرىلىس بەلسەندىلىگىنىڭ ءوسۋى ماڭعىستاۋ وبلىسىن قوسپاعاندا، 16 وڭىردە بايقالادى.
انىقتاما: كوشباسشىلار: تۇركىستان (%264)، سولتۇستىك قازاقستان (%154,5) ، قىزىلوردا (144)، اقمولا (135,3)، قوستاناي (119,8)، الماتى (109,9) وبلىستارى جانە الماتى (144,7)، شىمكەنت (117,6) قالالارى. قۇرىلىس يمپۋلسى داعدارىسقا قارسى قابىلدانعان شارالارعا بايلانىستى بولىپ وتىر. ال بۇل قۇرىلىس كومپانيالارىنىڭ كاسىپكەرلىك بەلسەندىلىگىن جانە حالىقتىڭ جۇمىسپەن قامتىلۋىن قامتاماسىز ەتەدى»، - دەدى ءمينيستردىڭ ءبىرىنشى ورىنباسارى.
وسى شارادا «وتباسى بانك» ا ق باسقارما ءتورايىمى ءلاززات يبراگيموۆا بيىل «باقىتتى وتباسى» باعدارلاماسى بويىنشا 5 مىڭ پاتەر بەرىلەتىنىن ايتتى.
«وتكەن جىل بانك ءۇشىن رەكوردتىق جىل بولعانىن اتاپ وتكەن ءجون. ءبىر جىلدىڭ ىشىندە 5 مىڭنان استام قازاقستاندىق «وتباسى بانك» قولداۋىمەن باسپانالى بولدى. ءاربىر بەسىنشى زاەم «نۇرلى جەر» مەملەكەتتىك باعدارلاماسى بويىنشا بەرىلدى. 2020 -جىلى ەلىمىزدىڭ بارلىق ايماقتارىنىڭ تۇرعىندارىنا «نۇرلى جەر» باعدارلاماسى اياسىندا 10759 پاتەر كىلتى تابىستالدى. وسى جىلدىڭ ءۇش ايىندا 3727 وتباسى قونىس تويىن تويلادى»، - دەدى بانك ءتورايىمى.
ءلاززات يبراگيموۆا بيىل «باقىتتى وتباسى» باعدارلاماسى بويىنشا نەشە پاتەر بەرىلەتىنىن دە اتادى. «باقىتتى وتباسى» باعدارلاماسىنا كەشەدەن بەرى ءبىزدىڭ سايت ارقىلى ونلاين فورماتتا ءوتىنىش قابىلداپ باستادىق. بيىل وعان 50 ميلليارد تەڭگە ءبولىنىپ وتىر. ءبىزدىڭ جوسپارلى ەسەبىمىز بويىنشا بۇل شامامەن 5000 وتباسى دەگەن ءسوز. تەك ءۇش ساناتقا عانا قاتىستى: كوپبالالى وتباسىلار، مۇمكىندىگى شەكتەۋلى بالالاردى تاربيەلەپ وتىرعان وجانۇيالار جانە تولىمسىز وتباسىلار. دۇيسەنبىدەن بەرى ۇيدەن شىقپاي- اق، ونلاين فورماتتا ءوتىنىم بەرۋ مۇمكىندىگى اشىلدى. قازىردىڭ وزىندە كەزەكتە تۇرعان 19833 ءوتىنىم باعدارلاما شارتتارىنا سايكەس كەلەدى. جالپى 23109 ءوتىنىم تۇسكەن بولاتىن، 3276 ءوتىنىم قابىلدانبادى. ونىڭ ىشىندە 500 ءوتىنىم ءۇش ساناتتىڭ بىرىنە دە جاتپايتىن ادامداردان تۇسكەن. ياعني، ولار كەزەكتە تۇرعان جوق. 2624 ادام مەملەكەتتىك قىزمەتكەر، بيۋدجەتتىك سالا ماماندارى، اسكەري قىزمەتكەرلەر رەتىندە تىركەلگەن. سوندىقتان بۇلار دا اتالمىش باعدارلاماعا سايكەس ەمەس. 123 ادام باسقا سانات بويىنشا كەزەكتە تۇر. ءتىپتى سوعىس ارداگەرى ساناتىندا تۇرعان 3 ادام ءوتىنىم بەرگەن»، - دەدى بانك «وتباسى بانكىنىڭ» باسشىسى.
اۆتور: ەسىمجان ناقتىباي