قازاقستاندا جەكە دەرەكتەر قاۋىپسىزدىگىن قامتاماسىز ەتۋ سەرۆيسى ەنگىزىلمەك
بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى اقپاراتتىق قاۋىپسىزدىك كوميتەتىنىڭ ءتوراعاسى رۋسلان ءابدىقالىقوۆ ءمالىم ەتتى، دەپ حابارلايدى قازاقپارات ءتىلشىسى.
«جەكە دەرەكتەر بويىنشا تۇزەتۋلەر جوباسى ازىرلەندى. تۇزەتۋلەردىڭ نەگىزگى باعىتتارىنا توقتالساق، جەكە دەرەكتەر قاۋىپسىزدىگىن قامتاماسىز ەتۋ سەرۆيسىن ەنگىزۋ ەسكەرىلىپ وتىر. بۇل ءوز كەزەگىندە ازاماتتارعا وزدەرىنىڭ جەكە مالىمەتتەرىن قاداعالاۋعا مۇمكىندىك بەرەدى. سەرۆيس ادامدارعا وزدەرىنىڭ دەرەكتەرىنە قاتىستى ءىس-قيمىلداردى قاراپ وتىرۋعا، جەكە مالىمەتتەرگە قاتىستى ەسكەرتپە الۋعا جاعداي جاسايدى»، - دەدى ر. ءابدىقالىقوۆ ورتالىق كوممۋنيكاتسيالار قىزمەتىندە.
ونىڭ ايتۋىنشا، اتالعان سەرۆيس ادامدارعا وزدەرىنىڭ جەكە دەرەكتەرىنە قاتىستى قۇقىقتارىن جۇزەگە اسىرا الاتىن تەتىككە اينالادى. سونىمەن قاتار جەكە مالىمەتتەردى جيناۋدا زاڭدىلىق تالاپتارى قامتاماسىز ەتىلمەك. مۇنىمەن قوسا، ول ازاماتتاردىڭ رۇقساتىنسىز كوپشىلىككە قولجەتىمدى رەسۋرستاردان الىنعان جەكە دەرەكتەردى جيناۋ مەن تاراتۋعا تىيىم سالۋ ەسكەرىلگەنىن ايتتى.
«بىلايشا ايتقاندا، ەگەر ازامات بۇل ءىس-قيمىلدارعا رۇقسات بەرمەسە، ينتەرنەتتە جاريالانعان جەكە مالىمەتتەردى جيناۋ مەن پايدالانۋعا، عالامتور- رەسۋرستارىنان دەرەكتەردى جاپپاي الۋعا تىيىم سالۋ ۇسىنىلىپ وتىر. بۇل قادام بەلگىسىز توپتار تاراپىنان جەكە دەرەكتەردى قاداعالاۋسىز پايدالانۋىنا توسقاۋىل قويۋ ءۇشىن كەرەك»، - دەدى ر. ءابدىقالىقوۆ.
بۇدان بۇرىن حابارلانعانداي، اتالعان كوميتەتتىڭ باسشىسى جەكە مالىمەتتەردىڭ تارالۋىنا قاتىستى ادامداردار كەلىپ تۇسكەن شاعىمداردى ايتتى.