اۋىل اكىمدەرى قانداي جاعدايدا قىزمەتتەن بوساتىلۋى مۇمكىن

نۇر- سۇلتان. قازاقپارات - ۇلتتىق ەكونوميكا مينيسترلىگى ماجىلىسكە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسىن تانىستىردى، دەپ حابارلايدى قازاقپارات ءتىلشىسى.

ماجىلىستە سايلاۋ تۋرالى زاڭناماعا ەنگىزىلەتىن تۇزەتۋلەر تانىستىرىلدى «ىلەسپە زاڭ جوباسى جەرگىلىكتى مەملەكەتتىك باقسراۋ جانە ءوزىن- ءوزى باسقارۋ، مەملەكەتتىك قىزمەتى تۋرالى جانە ساياسي پارتيالار تۋرالى زاڭدارعا تۇزەتۋلەر ەنگىزۋدى كوزدەيدى. بارلىعى 20 تۇزەتۋدەن تۇرادى»، - دەدى ۇلتتىق ەكونوميكا ءمينيسترىنىڭ ورىنباسارى الىشەر ءابدىقادىروۆ.

ۆيتسە- ءمينيستردىڭ ايتۋىنشا، جەرگىلىكتى مەملەكەتتىك باسقارۋ جانە ءوزىن- ءوزى باسقارۋ تۋرالى زاڭعا ەنگىزىلەتىن تۇزەتۋلەر اكىمدەردىڭ وكىلەتىن مىنا جاعدايلاردا توقتاتۋدى كوزدەيدى:

1. ەگەر اكىمدى پارتيا ۇسىنعان بولسا، پارتيا مۇشەلىگىنەن شىعارىلعان جاعدايدا؛

2. ءماسليحات سەنىمسىزدىك بىلدىرگەن جاعدايدا، ونىڭ ىشىندە جەرگىلىكتى قاۋىمداستىقتىڭ جيىنى ءتيىستى شەشىم شىعارعان جاعدايدا؛

3. مەملەكەتتىك قىزمەت تۋرالى زاڭنىڭ وزگە دە نەگىزدەمەلەرى بويىنشا، ياعني، سوت شەشمىمىمەن نەمەسە ءوز ەركىمەن قىزمەتتەن بوساتىلۋى، ازاماتتىقتان ايىرىلىۋ جانە ت. ب؛ «سونىمەن قاتار، جەرگىلىكتى ءماسليحات دەپۋتاتتارىنا اۋىل اكىمىنىڭ ارەكەتتەرىن تارتىپتىك كەڭەستە قاراۋ وكىلەتىن بەرۋ قاراستىرىلىپ وتىر»، - دەدى ءمينيستردىڭ ورىنباسارى.

«مەن نازارلارىڭىزدى مىناعان اۋدارعىم كەلەدى. اۋداندىق ماڭىزداعى قالالاردىڭ، كەنتتەر مەن اۋىلداردىڭ، اۋىلدىق وكرۋگتەردىڭ اكىمدەرىن سايلاۋ قازىرگى تاڭدا جاناما سايلاۋ جولىمەن تاعايىندالادى. ياعني، ولاردى اۋدان اكىمى ۇسىنىپ، ءماسليحاتتار سايلايدى. ال بۇگىن تانىستىرىلىپ وتىرعان زاڭ جوباسى بويىنشا اتالعان لاۋازىمدى تۇلعالار حالىقتىڭ تىكەلەي داۋىس بەرۋى ارقىلى سايلانادى. بۇل سايلاۋدىڭ پاراديگماسىن ايتارلىقتاي وزگەرتەدى»، - دەگەن ءماجىلىس وكىلى جاڭا وزگەرىس اۋدان اكىمدەرىنىڭ ۇمىتكەر ۇسىنۋ قۇقىعىن تولىقتاي شەكتەمەيتىنىن ەسكەرتتى.

«بۇل جەردە تاعى ەسكەرەتىن دۇنيە، اتالعان دەڭگەيدەگى اكىمدەردىڭ لاۋازىمىنا ۇمىتكەرلەردى اۋدان اكىمى ۇسىنۋ جۇيەسى ساقتالادى. ءبىراق بۇل مۇمكىندىك لاۋازىمدى ورىنعا ەشكىم ءوزىن- ءوزى ۇسىنباي قالسا جانە ساياسي پارتيالار ەشبىر كانديدات ۇسىنباسا عانا قولدانىلادى. مۇنى رەزەرۆتىك نۇسقا دەۋگە دە بولادى»، - دەدى ءماجىلىستىڭ زاڭناما جانە سوت- قۇقىقتىق رەفورما كوميتەتىنىڭ ءتوراعاسى قانات مۋسين «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا ەنگىزىلەتىن وزگەرتۋلەر مەن تۇزەتۋلەردى تالقىلاۋ بارىسىندا.

اۆتور: ەسىمجان ناقتىباي