ەلوردا اكىمدىگى ازىق-تۇلىكتىڭ قىمباتتاۋ سەبەپتەرىن ايتتى

نۇر-سۇلتان. قازاقپارات - نۇر-سۇلتان قالاسى ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى گۇلميرا ەرمولدينا ازىق-تۇلىك باعاسىنىڭ قىمباتتاۋىنا اسەر ەتكەن فاكتورلاردى ايتىپ بەردى، دەپ حابارلايدى قازاقپارات ءتىلشىسى.

«بۇل پاندەمياعا، شيكىزاتتىڭ قىمباتتاۋىنا جانە كولىك شىعىندارىنا بايلانىستى جانە وسىنىڭ بارىنە پاندەميا اسەر ەتكەنىن ايتقىم كەلەدى. ارينە، باعالار وسۋدە، ينفلياتسيا ءجۇرىپ جاتىر. بۇل ءوسىم بۇكىل رەسپۋبليكا اۋماعىندا بايقالادى»، - دەدى گ. ەرمولدينا ەلوردا اكىمدىگىندە وتكەن ونلاين بريفينگتە.

ونىڭ ايتۋىنشا، باعانىڭ وسۋىنە ازىق- تۇلىكتىڭ باسقا وڭىرلەردەن جەتكىزىلۋى دە ىقپال ەتەدى.

«ءىس جۇزىندە بارلىق ءونىم وزگە وڭىرلەردەن كەلەتىنىن ەسكەرسەك، بۇل قالاداعى باعالارعا دا اسەر ەتەدى. جىل باسىنان بەرى جەمىس- كوكونىس ونىمدەرى %7 عا، جۇمىرتقا %10 عا قىمباتتادى. تاۋىق جۇمىرتقاسىنا كەلسەك، قۇس ءولىمى بولعاندىقتان، باعانىڭ ءوسۋى بۇكىل رەسپۋبليكا بويىنشا تىركەلدى»، - دەيدى گ. ەرمولدينا.

بۇعان دەيىن سپيكەر ازىق-تۇلىك تاۋارلارىنىڭ قىمباتتاۋى وتكەن جىلعى كەزەڭنەن 6,2 پايىزعا تومەن ەكەنىن حابارلاعان ەدى.

اۆتور: ايجان سەرىكجان قىزى