قىرعىزستان پرەزيدەنتتىك رەسپۋبليكاعا اينالادى
رەفەرەندۋمگە دايىندىق جۇمىستارى نەبارى ەكى ايعا جالعاستى. سايلاۋشىلاردىڭ ءبىرازى نە ءۇشىن داۋىس بەرۋ كەرەك ەكەنىن ءجىتى تۇسىنە الماعان. سونداي- اق پلەبيستسيت جەرگىلىكتى كەنەشدەرگە سايلاۋمەن ءبىر مەزگىلدە ءوتتى. سوندىقتان كونستيتۋتسياعا تۇزەتۋلەردىڭ ءمانىن ءتۇسىنۋ ودان ءارى كۇردەلەنىپ كەتكەن. وتكەن سايلاۋ ناۋقاندارىمەن سالىستىرعاندا، بۇل جولى حالىقتىڭ بەلسەندىلىگى ەداۋىر تومەن بولعان. رەفەرەندۋم ناتيجەسى زاڭدى كۇشكە يە بولۋ ءۇشىن، سايلاۋشىلاردىڭ 30 پروتسەنتىنەن استامى داۋىس بەرۋى ءتيىس.
نۇرجان شايلدابەكوۆا، قىرعىزستان ورتالىق سايلاۋ كوميسسياسىنىڭ ءتوراعاسى:
- رەفەرەندۋمگە ءبىر ميلليون 336 مىڭ 743 سايلاۋشى قاتىسقان. بۇل داۋىس بەرۋ قۇقىعىنا يە ازاماتتاردىڭ جالپى سانىنىڭ %37,8 پروتسەنتى. ال ولاردىڭ 79,24 پروتسەنتى كونستيتۋتسياعا تۇزەتۋلەر ەنگىزۋدى قولداعان. اتا زاڭعا ەنگىزىلگەن تۇزەتۋلەرگە سايكەس ەلدەگى بار بيلىك پرەزيدەنتتىڭ قولىندا شوعىرلانادى. مەملەكەت باسشىسى سىرتقى ساياساتتى بەلگىلەپ، جوعارى جانە كونستيتۋتسيالىق سوتتىڭ سۋديالارىن تاعايىنداپ، ۇكىمەتتى باسقارادى. مينيسترلەر كابينەتىنىڭ جۇمىسىن پرەزيدەنت اكىمشىلىگى ۇيلەستىرەدى، ال پرەمەر- مينيستر قىزمەتى الىنىپ تاستالادى. پارلامەنت دەپۋتاتتارىنىڭ سانى ءجۇز جيىرمادان توقسانعا دەيىن قىسقاراتىن بولدى. جوگوركۋ كەنەشپەن قاتار حالىق قۇرىلتايى دا جۇمىس ىستەيدى. ءبىراق تۇراقتى نەگىزدە ەمەس. قۇرىلتاي مۇشەلەرى سەسسياعا جينالىپ تۇرادى. دەلەگاتتار مىندەتىن اتقارا الماعان شەنەۋنىكتەردى قىمەتىنەن بوساتۋ تۋرالى پرەزيدەنتكە ۇسىنىس جاساي الادى.
ولگا كوۆيتيدي، ۇ ق ك ۇ پارلامەنتتىك اسسامبلەياسىنىڭ بايقاۋشىسى:
- ورتالىق سايلاۋ كوميسسياسىنا تۇسكەن ەسكەرتۋلەر سايلاۋ ناتيجەسىنە اسەر ەتە المايدى. ۇجىمدىق قاۋىپسىزدىك كەلىسىمشارت ۇيىمى پارلامەنتتىك اسسامبلەياسىنىڭ حالىقارالىق بايقاۋشىلارى رەفەرەندۋم زاڭدى وتكەنىن مالىمدەدى. رەفەرەندۋم بارىسىندا 93 مىڭداي جارامسىز بيۋللەتەن تىركەلدى. ءبىر بولىگىن ادەيى بۇلدىرگەن، قالعانى بوس، تولتىرىلماعان. ورتالىق سايلاۋ كوميسسيا وكىلدەرى ازاماتتاردىڭ سانالى تاڭداۋ جاساۋى ءۇشىن، كەز كەلگەن وزەكتى ماسەلەگە قاتىستى بۇكىل حالىقتىق داۋىس بەرۋ پروتسەسىن سايلاۋمەن ءبىر ۋاقىتتا وتكىزۋدىڭ قاجەتى جوق ەكەنىن العا تارتادى.
الايدا پلەبيستسيت وتكىزەر الدىندا ەل بيلىگى بولەك ناۋقانداردى وتكىزۋ بيۋدجەتكە تىم قىمبات بولاتىنىن مالىمدەگەن ەدى. سونداي- اق كۇزدە پارلامەنتتىك سايلاۋ وتەتىنىن دە ەسكەرۋ كەرەك دەيدى. باكىت چەرماشيەۆ
www.24.kz