ق ر قارجى ءمينيسترى بولىنگەن قارجىنى يگەرە الماعان مينيسترلىكتەردى اتادى
بۇل تۋرالى بۇگىن ۇكىمەت وتىرىسىندا ق ر قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«مەملەكەتتىك بيۋدجەتتىڭ شىعىستارى 99,5، رەسپۋبليكالىق بيۋدجەتتىڭ شىعىستارى - 99,8، جەرگىلىكتى بيۋدجەتتەردىڭ شىعىستارى 99,1 پايىزعا اتقارىلدى. وتكەن جىلدىڭ ۇقساس كەزەڭىمەن سالىستىرعاندا بيۋدجەتتەردىڭ بارلىق دەڭگەيلەرىندە اتقارىلۋ كورسەتكىشى جوعارى. رەسپۋبليكالىق بيۋدجەت بويىنشا سوماسى 3,5 تريلليون تەڭگەگە شىعىستار جۇرگىزىلدى. اتقارىلماۋ 7 ميلليارد تەڭگەنى قۇرادى. ونىڭ ىشىندە 4 ميلليارد تەڭگە - ۇنەمدەۋ. 3 ميلليارد تەڭگە يگەرىلمەگەن»، - دەدى ەرۇلان جاماۋبايەۆ.
ونىڭ اتاپ وتۋىنشە، يگەرىلمەۋدىڭ نەعۇرلىم ءىرى سومالارى قارجى، مادەنيەت جانە سپورت، ادىلەت مينيسترلىكتەرى جانە قارجى نارىعىن رەتتەۋ جانە دامىتۋ اگەنتتىگىندە قالىپتاسىپ وتىر.
«يگەرىلمەۋدىڭ نەگىزگى سەبەپتەرى: كونكۋرستىق راسىمدەردى ۇزاق ۋاقىت وتكىزۋ جانە ۋاقتىلى وتكىزبەۋ، تولەم ناقتى كورسەتىلگەن قىزمەت، جۇمىس كولەمى بويىنشا جۇرگىزىلۋى، بيۋدجەتتىك باعدارلامالار (كىشى باعدارلامالار) بويىنشا نورماتيۆتىك قۇقىقتىق اكتىلەردى ۋاقتىلى قابىلداماۋ، سوتتا مەملەكەتتىڭ مۇددەسىن قورعاۋ جونىندەگى تالاپ- ارىز جۇمىستارىنىڭ جۇرگىزىلۋى»، - دەدى ول.
اۆتور: مارلان جيەمباي