فۋتزال: قازاقستان قۇراماسى يزرايلدەن ەكىنشى مارتە باسىم ءتۇستى
بۇعان دەيىن قازاقستاندىق فۋتزالشىلار بەس ويىن وتكىزدى. ولار ۆەنگريا (5:0، 6:1) مەن بەلارۋستى (5:2، 6:1) قاپى قالدىرىپ كەتتى. ودان كەيىن ەلوردادا يزرايلدى 4:1 ەسەبىمەن تىزە بۇكتىردى.
بۇگىنگى كەزدەسۋدە 1-مينۋتتا قازاقستاندىق قۇراما ساپىنان تاينان ەسەپ اشتى. ودانك ەيىن 4-مينۋتتا تيمۋر بالتابايەۆ ەسەپتى ۇستەمەلەي ءتۇستى.
ەكىنشى كەزەڭنىڭ 21-مينۋتىندا قازاقستاندىق جومارت توقايەۆ مەرگەندىك كورسەتسە، تاينان 24-مينۋتتا قورىتىندى ەسەپتى بەلگىلەدى.
وسىلايشا قارسىلاسىنان 4:0 ەسەبىمەن باسىم ءتۇستى.
ايتا كەتەرلىگى، اتالعان كەزدەسۋدە قازاقستاندىق بەلگىلى ويىنشى سەرىك جامانقۇلوۆ ۇلتتىق قۇراما ساپىنداعى سوڭعى ويىنىن وتكىزدى.
ول الماتىلىق «قايرات» ساپىندا ەلىمىزدىڭ ون دۇركىن چەمپيونى اتانىپ، ەكى مارتە ۋەفا كۋبوگىن يەلەندى. ۇلتتىق قۇراما قاتارىندا دا ءبىرقاتار ماڭىزدى كەزدەسۋگە قاتىستى. قازاقستان قۇراماسى ىرىكتەۋ كەزەڭىندە بىردە-ءبىر ۇپاي جوعالتقان جوق.
بارلىعى 18 ۇپاي جيناعان قۇراما تۋرنير كەستەسىندە ءبىرىنشى ورىن الدى. اتالعان بەسىنشى توپتا 13 ساۋىردە بەلارۋس جانە ۆەنگريا قۇرامالارى شەبەرلىك بايقاسادى.
وسىلايشا ىرىكتەۋ كەزەڭى مارەسىنە جەتەدى. ەۋروپا چەمپيوناتىنىڭ فينالدىق ساتىسى 2022-جىلدىڭ 19- قاڭتار جانە 6- اقپان ارالىعىندا نيدەرلاندىنىڭ امستەردام جانە گرونينگەن قالالارىندا وتكىزىلەدى.