قاسىم-جومارت توقايەۆ حانزادا فيليپپتىڭ قازاسىنا وراي كوڭىل ايتۋ جەدەلحاتىن جولدادى

None
None
نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ ۇلى بريتانيا جانە سولتۇستىك يرلانديا قۇراما كورولدىگىنىڭ پاتشايىمى II ەليزاۆەتاعا جۇبايى حانزادا فيليپپتىڭ قايتىس بولۋىنا بايلانىستى كوڭىل ايتۋ جەدەلحاتىن جولدادى.

قازاقپارات بۇل تۋرالى اقورداعا سىلتەمە جاساپ حابارلايدى.

مەملەكەت باسشىسى قاسىم-جومارت توقايەۆ ەدينبۋرگ گەرتسوگى، حانزادا فيليپپتىڭ قايتىس بولعانى تۋرالى قايعىلى حاباردى تەرەڭ كۇيزەلىسپەن قابىلدادى.

«قازاقستان حالقىنىڭ جانە جەكە ءوزىمنىڭ اتىمنان ۇلى مارتەبەلى پاتشايىم ءسىزدىڭ جانە بارشا بريتاندىقتاردىڭ قايعىسىنا ورتاقتاسا وتىرىپ، كوڭىل ايتامىن. 70 جىلدان استام ۋاقىت بويى، اسىرەسە، ۇلى مارتەبەلى پاتشايىم ءسىز تاققا وتىرعان ساتتەن باستاپ، ەدينبۋرگ گەرتسوگى تۇراقتى تىرەگىڭىز جانە كۇش-جىگەرىڭىزدىڭ سارقىلماس كوزى بولدى. ول ەكىنشى دۇنيەجۇزىلىك سوعىستىڭ قۇرمەتتى باتىرى، بۇكىل ءومىرىن بىرىككەن كورولدىك پەن ونىڭ تاجىنە قىزمەت ەتۋگە ارناعان، مۇقتاج جاندارعا كومەكتەسىپ، بريتانيا ۇلتىنىڭ، دوستاستىق پەن ودان تىس جەرلەردەگى حالىقتىڭ ءال-اۋقاتىن ارتتىرۋعا ۇلەس قوسقان اسا كورنەكتى، ۇلى مارتەبەلى بيىك تۇلعا بولدى. وسىنداي قيىن ساتتە ءبىزدىڭ دۇعامىز ءسىزدىڭ ۇلى مارتەبەڭىزگە، كورولدىك وتباسىڭىزعا، سونداي-اق، حانزادا فيليپپتى بىلەتىن جانە قىزمەتتەس بولعان ادامدارعا ارنالدى. ول ءبىزدىڭ جادىمىزدا پاراساتتىلىق پەن ادىلدىكتىڭ، باتىلدىق پەن ءوز حالقىنا ادالدىقتىڭ سيمۆولى رەتىندە ماڭگى ساقتالادى»، - دەلىنگەن جەدەلحاتتا.

سوڭعى جاڭالىقتار