تۇركىستاندا ساكۋرا اعاشى گۇلدەدى

نۇر-سۇلتان. قازاقپارات - ياساۋي كەسەنەسى اۋماعىنداعى بوتانيكالىق باقتا جاپون ەلىنىڭ سيمۆولى سانالاتىن ساكۋرا اعاشى گۇلدەدى.

يسلام باعى نەگىزىندە سالىنعان ەرەكشە ساياباققا بيىل گەرمانيادان ساكۋرانىڭ 200 ءتۇپ كوشەتى ارنايى اكەلىنىپ، ەگىلگەن بولاتىن. ونى باپتاپ، وسىرەتىن كومپانيا وكىلى دميتريي لينەنكونىڭ ايتۋىنشا، ساكۋرا تۇركىستاننىڭ تابيعاتىنا تەز جەرسىنەدى. سەبەبى بۇل كوشەتتەر بۇعان دەيىن 10-15 جىل بويى، ءار 3 جىل سايىن ءارتۇرلى تۇقىمباققا ەگىلىپ، ابدەن سىناقتان وتكەن. ءسويتىپ كەز كەلگەن جەرگە وتىرعىزۋعا ابدەن بەيىمدەلگەن. سودىقتان ساكۋرانى ەلدىڭ بارلىق ايماعىنا ەگۋگە بولاتىنىن ايتادى. ءبىراق ەرەكشە كۇتىم كەرەك. اۋماعى 7 گەكتاردان استاتىن بوتانيكالىق باقتا ساكۋرادان باسقا، الەمدە سيرەك كەزدەسەتىن مىڭعا جۋىق اعاش كوشەتى ەگىلگەن. جاقىن كۇندەرى مۇندا مىڭداعان قىزعىلت، كۇلگىن، اق تۇسكە بويالعان شيە اعاشى گۇلدەيدى.

دميتري لينەنكو، كوشەت وسىرەتىن كومپانيا وكىلى:

- مۇندا ساكۋرانىڭ 5 ءتۇرى وتىرعىزىلعان. ونىڭ ۇشەۋى اق گۇل اشسا، قالعان ەكەۋى كۇلگىن ءتۇستى گۇل اشادى. ولار ءار جىل سايىن ءساۋىر، مامىر ايلارىندا ەكى اپتا بويى گۇل اشىپ، جۇپارىن شاشىپ تۇرادى. گۇلدەرى تۇسكەن سوڭ، ادەمى جاسىل جاپىراقتارى اينالاعا ءسان بەرەدى. ساكۋرانى قازاقشا ايتقاندا «جەمىس بەرمەيتىن شيە» دەۋگە دە بولادى. ءوزىن جايلى سەزىنۋ ءۇشىن تۇبىنە مينەرالدى تىڭايتقىشتار سالىپ، تامشىلاتىپ سۋارۋ جۇيەسىنە قوسىلعان.

www.24.kz