قازاقستانداعى ۆاكسينالار ۆيرۋستىڭ مۋتاتسيالانعان تۇرىنە قارسى تۇرا الا ما
بۇل تۋرالى ونلاين بريفينگ بارىسىندا س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ ينفەكسيالىق جانە تروپيكالىق اۋرۋلار كافەدراسىنىڭ پروفەسسورى، مەديتسينا عىلىمدارىنىڭ دوكتورى كۇلاش قۇرمانوۆا ايتتى، دەپ حابارلايدى قازاقپارات ءتىلشىسى.
«سپۋتنيك V « جانە قازاقستاندىق «QazCovid-in» ۆاكسيناسى - ۆەكتورلىق بولىپ تابىلادى جانە ادام ادەنوۆيرۋسىنىڭ رەكومبينانتتى بولشەكتەرى، ولاردا كوروناۆيرۋس قابىقشاسىنىڭ S پروتەينى - انتيدەنەلەر بولىنەتىن اقۋىز بار. بۇل ۆاكسينالار كەز كەلگەن مۋتاتسيالانعان كوروناۆيرۋس شتاممدارىنا قارسى ءتيىمدى بولادى»، - دەيدى سپيكەر.
سونىمەن قاتار، ول ۆاكسينا سالدىرعان سوڭ قالىپتاساتىن يممۋنيتەت قانشا ۋاقىتقا دەيىن جەتەتىنىن ايتتى.
«ۆاكسينا العان سوڭ قالىپتاساتىن يممۋنيتەت كەم دەگەندە ءبىر جىلعا شىدايدى، ال كەيبىرىندە وداندا كوپ ۋاقىتقا بارادى. بۇل ادام اعزاسىنا بايلانىستى. ال، ۆيۋرس جۇقتىرىپ، تابيعي جولمەن قالىپتاسقان يممۋنيتەتكە كەلسەك، ول دا اۋرۋ تۇرىنە قاراي بولادى. ماسەلەن، كەيبىرىندە سىرقات جەڭىل ءوتۋى مۇمكىن، ولاردىڭ يممۋنيتەتى كوپ ساقتالمايدى، تىپتەن بولماۋى دا مۇمكىن. سونداي- اق سىرقات اۋىر جۇرگەن كەزدە ناۋقاستىڭ يممۋندىق جۇيەسىن السىرەتىپ جىبەرەدى، ولاردا دا ۆيرۋسقا قارسى يممۋنيتەت قالىپتاسپاي قالادى. سوندىقتان ۆاكسينا العان دۇرىس»، - دەيدى كۇلاش قۇرمانوۆا.
مامان كوروناۆيرۋسپەن اۋىرعان ادامدار وڭالتۋدى قاجەت ەتەتىنىن جەتكىزدى.
«ەپيدەميولوگتار مەن ءارتۇرلى ماماندىقتاعى دارىگەرلەردىڭ، اتاپ ايتقاندا ينفەكسيونيستەر، نەفرولوگتار، ەندوكرينولوگتار، نيەۆرولوگتار پىكىرىمەن كەلىسەمىن. كوروناۆيرۋس ينفەكسياسى ىشكى ورگانداردى، اسىرەسە مي، جۇرەك، بۇيرەك، باۋىر جانە تاعى باسقا اعزانى زاقىمدايدى، ونىڭ سالدارى ءار ادامدا اۋرۋعا دەيىنگى دەنساۋلىق جاعدايىنا، ينفەكتسيالىق پروتسەستىڭ اۋىرلىعىنا بايلانىستى ءار ءتۇرلى كورىنەدى. سوندىقتان ءار ناۋقاستىڭ جاعدايىنا جەكە قاراۋ قاجەت. جالپى، فيزيكالىق تۇرعىدا بەلسەندىلىك، دۇرىس تاماقتانۋ، تولىق ۇيقى، جامان ادەتتەردەن باس تارتۋ مۇنىڭ ءبارى يممۋنيتەتتى كوتەرەدى»، - دەيدى پروفەسسور.
اۆتور: الما مۇقانوۆا